VOV4.Sêdang - Kơxê lơ 30/9, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa hiăng tơdah pôa Gareth Ward, Kăn teăng mâ Khu lâp kong têa a kong têa Ăng-glê ƀă peăng kơnhŏng Ireland a Việt Nam.

Ngế pro xiâm hnê ngăn tơnêi têa mơnhên Ăng-glê cho môi tung mâu khu tơrŭm cheăng kâ ki kal má môi dêi Việt Nam a châu Âu; péa tơnêi têa kal tơrŭm krá tơniăn tâ nếo vâ pêi pro tâi tâng mâu roh ing Tơdroăng tơkêa bro tê mơdró tơ’lêi hlâu pơla péa pâ pơkâ Ăng-glê lôu péa tâ mê nếo ‘na kơchơ tê mơdró ăm tơmeăm tê ngi kong têa ê dêi Việt Nam, tơdrêng amê, mơhnhôk mâu khu tê mơdró kong têa Ăng-glê po rơdâ mơ’no liăn cheăng a Việt Nam, ki rơhêng vâ tối tung mâu kơvâ hên tơmeăm ki mơnhông mơdêk môi tiah tơdroăng tê mơdró ‘na liăn ngân – hngêi arak liăn, têa châu têa kơxăng, on tơhrik ki vêh pro, tơdroăng cheăng kâ, kơmăi kơmok uâ mơdiê, mơjiâng.

Pôa Phạm Minh Chính, Ngế pro xiâm hnê ngăn tơnêi têa tơdah Kăn teăng mâ kong têa Ăng-glê ƀă peăng kơnhŏng Ireland a Việt Nam

Klăng roh kố, pôa Phạm Minh Chính pơtroh rơkong mơnê păng ‘nâng troh Chin phuh ƀă kuăn pơlê kong têa Ăng-glê hiăng tŏng kum 415 rơpâu kong kếo vaccine AstraZeneca ăm Việt Nam. Ngế pro xiâm hnê ngăn tơnêi têa pói vâ péa tơnêi têa pơtối thăm mơnhông tơrŭm cheăng tung kơvâ khăm pơlât, ki málối cho mơdêk ivá khăm pơlât ƀă mơnhông kơmăi kơmok mơjiâng pro pơkeăng; pơkâ thế kong têa Ăng-glê pơtối tŏng kum vaccine, tơmeăm khăm pơlât, séa ngăn pơcháu ăm kơmăi kơmok mơjiâng pro vaccine, xing xoăng pơkeăng pơlât COVID-19.

A Sa Ly tơplôu ƀă tơbleăng