VOV4.Sêdang - Klăng roh Hneăng hôp mơ’no tơdrêng tung um tiô troăng măng internet Khu râ kăn xiâm peăng mâ hâi lo châu Á dó inâi EAS roh má 16, kơxê lơ 27/10, pôa Phạm Minh Chính, Ngế pro xiâm hnê ngăn tơnêi têa hiăng ai roh tơdah tơpui tơno mâu Kăn teăng mâ mâu kong têa veăng EAS a Hà Nội, ahdrối veăng Hneăng hôp ing tíu mơ’no um tơdrêng tiô troăng măng internet a Hà Nội.

Xông tơpui a roh tơdah, pôa Phạm Minh Chính vêh mơnhên Việt Nam môi tuăn troăng hơlâ tơpui kâ tơniăn krê, pơkuâ dêi hnoăng cheăng, ai hên troăng tơrŭm tơpui kâ ƀă kong têa ê; hbrâ pêi, thăm mot tơrŭm lâp plâi tơnêi tŭm túa, trâu hơngế; cho pú hmâ, khu ki loi tơngah cho khu tơrŭm ki hôm păng ‘nâng, ai hnoăng cheăng tung mâu kong têa lâp plâi tơnêi. Ing mê, Việt Nam đi đo nhuô̆m thăm tơrŭm cheăng pơla rêm pâ, tơrŭm lĕm tro ƀă mâu kong têa, tơdjuôm ivá rak hơniâp lĕm, gak kring, tơniăn ƀă mơnhông mơdêk, thăm tơrŭm hên troăng hơlâ, tơdjêp ƀă mot tơrŭm lâp plâi tơnêi xua môi plâi tơnêi ngiât lĕm, krúa rơdêi, mơnhông mơdêk krá tơniăn, tâi tâng ƀă rơkê lĕm tâ.

A Sa Ly tơplôu ƀă tơbleăng