VOV4.Sêdang - Tiô pơkâ dêi peăng Chile, pôa Phạm Minh Chính, Ngế pro xiâm hnê ngăn Chin phuh hiăng ai roh tơpui phôn ƀă Kăn xiâm pơkuâ kong têa Kŏng hoa Chile vâ tơpui tơno ‘na tơrŭm cheăng Việt Nam – Chile xuân môi tiah tơrŭm cheăng pơla péa tơnêi têa hbrâ ví kong prâi hơ’lêh, kum tung tơdroăng châ tơƀrê dêi hneăng hôp khu râ kăn xiâm dêi Khu lâp kong têa ‘na kong prâi hơ’lêh roh má 26 (COP26) la ngiâ.

Pôa Phạm Minh Chính, Ngế pro xiâm hnê ngăn Chin phuh hiăng ai roh tơpui phôn ƀă Kăn xiâm pơkuâ kong têa Kŏng hoa Chile

A roh tơpui phôn, péa kăn xiâm pơkuâ kheăn kơdeăn tơdroăng mơnhông mơdêk dêi tơrŭm pơla péa pâ, ki rơhêng vâ tối cho tơdroăng kơxô̆ liăn tê mơdró pơla péa pâ tung 9 khế apoăng hơnăm 2021 châ 1,47 rơtal dollars, tâk 59% tâng pơchông ƀă roh kố hơnăm nah. Péa pâ môi tuăn mâu troăng thăm tơrŭm tŭm têk pơla péa tơnêi têa tung la ngiâ.

Péa pâ môi tuăn thăm tơrŭm krá tơniăn ƀă môi tuăn dêi pó a mâu khu tơrŭm lâp plâi tơnêi ƀă hneăng hôp tơpui tơno pơla rêm pâ, kum thăm tơrŭm cheăng pơla ASEAN ƀă Khu tơrŭm Thái Bình Dương, kum tung hơniâp lĕm, tơniăn, tơrŭm ƀă mơnhông mơdêk a péa kơpong.

A Sa Ly tơplôu ƀă tơbleăng