VOV4.Sêdang - Klêi kơ’nâi troh Ănglê vâ veăng hôp a Rôh hôp má 26 rêm pâ ki veăng Tơkêa dêi Khu lâp kong têa ‘na Kong prâi pro hơ’lêh ƀă lăm pôu pêi cheăng a kong têa Ănglê, pôa Phạm Minh Chính, Ngế pro xiâm hnê ngăn Chin phuh hiăng trâm jâ Nicola Sturgeon, ngế pơkuâ kong pơlê Scotland. Jâ Nicola Sturgeon tối, loi tơngah Việt Nam kô veăng kum tung tơdroăng ki ƀlêi trâng tơdjuôm dêi Rôh hôp. Ngế pơkuâ kong pơlê phiu ro tơdroăng ki veăng kum kal khât dêi Việt Nam cho ivá tơdjuôm vâ hbrâ ví ƀă kong prâi pro hơ’lêh, ăm ‘nâi Scotland hiăng tơhrâ kơdroh ki trếo mơ’no ‘na hbo plêng a hơnăm 2045 ƀă krê pơlê kong kân Glasgow, tíu ki po mâu tơdroăng hôp dêi Rôh hôp kân COP26, tơhrâ kô kơdroh mơ’no trếo ‘mêi a hbo plêng a hơnăm 2030.

Pôa Phạm Minh Chính, Ngế pro xiâm hnê ngăn tơnêi têa trâm jâ Nicola Sturgeon, kăn pơkuâ kong pơlê kân Scotland

Pôa Phạm Minh Chính mơnhên tối khât ki ai hlâu ‘na mơnhông tơrŭm cheăng pơla Việt Nam – Scotland, kơpong cheăng kâ mơnhông kân má péa dêi kong têa Ănglê ôh ti xê ai to drôu whisky ki lâp plâi tơnêi ô eăng mê ối ai hên ki rơdêi ‘na hơ’lêh nếo rơkê, cheăng kâ kơxô̆, liăn ngân – ƀaoh hiêm, hrik chuâ têa châu, têa kơxăng, malối cho mơjiâng pro on tơhrik.

Katarina Nga tơplôu ƀă tơbleăng