VOV4.Sêdang - Pơtối mâu tơdroăng kal mê cho Hneăng hôp khu râ kăn xiâm Khu mâu kong têa peăng mâ hâi lo pá hdroh châu Á (ASEAN) roh má 38 ƀă 39, tung kơxê lơ 26/10, pôa Phạm Minh Chính, Ngế pro xiâm hnê ngăn Chin phuh veăng Hneăng hôp khu râ kăn xiâm ASEAN – Hàn Quốc. Xông tơpui a hneăng hôp, pôa Phạm Minh Chính mơnhên tối, lối 30 hơnăm hiăng hluâ, tơrŭm cheăng ASEAN – Hàn Quốc hiăng mơnhông ó rơdêi, châ tơƀrê hên tơdroăng ki kal, păng ‘nâng, kum hên tung mơjiâng hơniâp lĕm, gak kring ƀă mơnhông mơdêk kro mơdrŏng a kơpong.

Việt Nam phiu ro ƀă môi tuăn Hàn Quốc pêi pro ‘’Troăng hơlâ tơmiât troh peăng Hdroh nếo tơtêk’’ thăm tơrŭm cheăng ƀă kơpong xua mâu pơkâ tơmiât troh kuăn pơlê, Hơniâp lĕm ƀă kro mơdrŏng; tơtro ƀă 3 tơdroăng ki xiâm tơrŭm cheăng dêi Pơlê pơla ASEAN. Pôa Phạm Minh Chính môi tuăn ƀă pơkâ thế Hneăng hôp kố tơbleăng ăm pêi pro Tơbleăng tơdjuôm ‘na thăm tơrŭm cheăng ASEAN – Hàn Quốc.

A Sa Ly tơplôu ƀă tơbleăng