VOV4. Xơ Đăng - Kơxo lơ 21/12, Khu xiâm mơjiâng luât tơkŭm po Rôh hôp lâp tơnêi têa tơbleăng hnoăng cheăng luât hơnăm 2022 tiô tơdroăng ki ‘no tơdrêng ing troăng hyôh Internet a 63 tíu mơ’no cho mâu kong pơlê, pơlê kong kân. Veăng hôp ƀă tơpui a rôh hôp, pôa Phạm Minh Chính, Ngế pro xiâm hnê ngăn tơnêi têa teăng mâ Đảng, Tơnêi têa, mơnhên tối khât ivá mơ-eăm, pôu râng hnoăng cheăng dêi tâi tâng kơvâ luât, khu tơrŭm luât mâu khu xiâm, kơvâ cheăng, kơ koan luât kong pơlê hiăng pêi châ hên tơdroăng ki kal.

Pôa Phạm Minh Chính, Ngế pro xiâm hnê ngăn tơnêi têa tơpui a rôh hôp

Tung la ngiâ ah, Ngế pro xiâm hnê ngăn tơnêi têa pơkâ thế kal tơkŭm mâu kơxô̆ liăn pêi pro 6 hnoăng cheăng ki kal tung hơnăm 2022. Tung mê, tối nhên tơdroăng ki mơdêk hlê plĕng ‘na tíu pêi cheăng, hnoăng cheăng ki kal dêi tơdroăng cheăng mơjiâng ƀă pêi pro luât; séa ngăn troăng hơlâ pơkâ dêi Đảng, tơdroăng ki ai khât va rĕng pêi pro hơ’lêh luât, tơƀrê, pơkâ tơleăng mâu tơdroăng xơpá, tơvâ tơvân ‘na tơdroăng pơkâ.

Katarina Nga tơplôu ƀă tơbleăng