VOV4.Xơ Đăng - Kơxê lơ 14/12, a Hà Nội, pôa Phạm Minh Chính, Ngế pro xiâm hnê ngăn tơnêi têa hiăng veăng tơdroăng hlo tơƀrê pơxiâm tăng cheăng pêi pơ’lêh nếo tơmiât pêi rơkê tơnêi têa ƀă Măng tĭng leh Pơ’lêh nếo tơmiât pêi rơkê ƀă Pơxiâm tăng cheăng pêi Pơlê kong kân Hồ Chí Minh (TECHFEST ƀă WHISE 2021) xua Khu xiâm pơkuâ Khoa hok ƀă Kơmăi kơmok tơrŭm ƀă Khu xiâm tơpui kâ, Vi ƀan Pơlê kong kân kân Hồ Chí Minh, Ƀơrô tê mơdró ƀă kơmăi kơmok Việt Nam tơkŭm po tiô troăng mơ’no tơdrêng tung um tiô troăng măng Internet ƀă mơ’no tơdrêng tung um tơvi  ƀă 63 tíu hrik hyôh a mâu kong pơlê, pơlê kong kơdrâm ƀă vâ chê 20 kong têa tung lâp plâi tơnêi.

Tơdroăng ki hlo tơƀrê pơxiâm tăng cheăng pêi pơ’lêh nếo tơmiât pêi rơkê tơnêi têa ƀă Măng tĭng leh Pơ’lêh nếo tơmiât pêi rơkê ƀă pơxiâm tăng cheăng pêi Pơlê kong kân Hồ Chí Minh ƀă pơkâ tơmiât pêi la ngiâ: po troăng tơmiât, po mâu troăng pêi rơkê ki nếo, tơrŭm tung tơdroăng pơxiâm tăng cheăng pêi rơkê tơnêi têa. 

TECHFEST 2021 pro krá khâp tíu tơrŭm ôh tá ai tơkăng pơla kuăn mơngế Việt Nam, tuăn ngôa rơkê Việt Nam ƀă tơdroăng pói tơngah Việt Nam. Xông tơpui a roh kố, pôa Phạm Minh Chính tối, pơ’lêh nếo, tơmiât pêi rơkê cho pơkâ tiô pakong dêi tơdroăng mơnhông mơdêk. Ngế pro xiâm hnê ngăn tơnêi têa pơkâ thế mâu khu râ, mâu kơvâ cheăng vêh mơgêi tơdroăng pơ’lêh nếo tơmiât pêi rơkê vâ ai tơdroăng ki kal, ƀai hriâm, túa ki rơkê tơtro ăm pơ’lêh nếo tơmiât pêi rơkê nôkố ƀă tung la ngiâ.

A Sa Ly tơplôu ƀă tơbleăng