VOV4.Sêdang - Hâi lơ 8/10/2021 a tíu pêi cheăng Chin phuh, pôa Phạm Minh Chính hiăng ai roh tơpui phôn ƀă pôa John Kerry, Kăn teăng mâ dêi Kăn xiâm pơkuâ kong têa Mih ‘na kong prâi hơ’lêh. Péa pâ môi tuăn mơnhên tơrŭm cheăng Việt Nam – Mih klêi kơ’nâi lối 25 hơnăm pơtối mơnhông mơdêk tơniăn, tung mê tơrŭm cheăng kâ – tê mơdró, tơrŭm mơnhông mơdêk krá tơniăn cho ki xiâm ƀă tơrŭm mơjiâng on tơhrik krúa lĕm, vêh mơjiâng troăng ki má môi, mơhnhôk nếo.

Klăng roh kố, teăng mâ Chin phuh ƀă kuăn pơlê Việt Nam, pôa Phạm Minh Chính xuân tối mơnê ƀă Chin phuh ƀă kuăn pơlê Mih hiăng tŏng kum vaccine ƀă tơmeăm khăm pơlât ăm Việt Nam vâ hbrâ mơdât pơreăng COVID-19 tung pơla kố nah. Pôa Phạm Minh Chính kheăn kơdeăn tơdroăng khŏm mơ-eăm dêi pôa Joe Biden, Kăn xiâm pơkuâ kong têa Mih thăm mơ-eăm tơdjuôm lâp plâi tơnêi vâ hbrâ ví ƀă tơdroăng kong prâi pro ôh tá tơniăn. Kố cho tơdroăng lâp plâi tơnêi xua mê lâp plâi tơnêi kal ‘nâi.

Ngế pro xiâm hnê ngăn tơnêi têa xuân pơkâ thế peăng kong têa Mih pơtối thăm tŏng kum Việt Nam tơleăng tơdroăng tơplâ, ki má lối cho pro mơgrúa trếo ‘mêi dioxin, ing mê kum pro mơgrúa kong prâi ƀă mơnhông mơdêk krá tơniăn a Việt Nam.

A Sa Ly tơplôu ƀă tơbleăng