VOV4.Sêdang - Tung Rôh po Hneăng hôp COP26, pôa Phạm Minh Chính, Ngế pro xiâm hnê ngăn Chin phuh hiăng ai rôh trâm pôa Joe Biden, kăn xiâm pơkuâ kong têa Mih, pôaMoon Jae-in, kăn xiâm pơkuâ kong têa Hàn Quốc, pôa  Prayud Chan-o-cha, Ngế pro xiâm hnê ngăn kong têa Siam, tơdah kăn xiâm hnê ngăn xuân cho kăn pơkuâ Khu rak liăn ‘na Kong prâi, tơnêi tơníu lâp plâi tơnêi. Tung rôh trâm pôa Joe Biden, kăn xiâm pơkuâ kong têa Mih, pôa Phạm Minh Chính mơnhên tối tơdroăng ki pôa Joe Biden mơdêk tơrŭm cheăng ƀă Việt Nam ƀă mâu kong têa châu Á, tối nhên Việt Nam ngăn nhuô̆m tơrŭm cheăng ƀă Mih ƀă rơphêng vâ mơnhông tơrŭm cheăng rế hía rế trâu hngế, tơniăn.

Pôa Phạm Minh Chính, Ngế pro xiâm hnê ngăn Chin phuh a Rôh hôp COP26

Pôa Joe Biden mơnhên tối khât tơdroăng ki veăng hbrâ rơnáu, kơhnâ ƀă tơhrâ rơdêi dêi Việt Nam a rôh hôp COP26.Péa ngế kăn xiâm pơkuâ môi tuăn mơdêk tơrŭm cheăng tung tâi tâng pơla Việt Nam – Mih mơnhông tơƀrê tâ nếo, tung mê ai tá tơrŭm cheăng ‘na liăn ngân kơmăi kơmok vâ tŏng kum mâu tơdroăng ‘na kong prâi, malối cho pêi pro tŭm mâu tơdroăng pơkâ tiô Tơkêa Paris, phiu ro tơdroăng ki veăng dêi mâu kŏng ti Mih tung mâu kơvâ cheăng mơnhông ngiât, mơnhông krá tơniăn a Việt Nam.

Katarina  Nga tơplôu ƀă tơbleăng