VOV4.Sêdang -Drêng veăng Hôp COP26, lăm pôu pêi cheăng a kong têa Ănglê, pôa Phạm Minh Chính, Ngế pro xiâm hnê ngăn tơnêi têa hiăng ai rôh trâm mâ ƀă pôa António Guterres, Kăn xiâm chêh tôm xo rơkong khu lâp kong têa. A rôh trâm mâ, tơpui tơno ƀă Kăn xiâm chêh tôm xo rơkong khu lâp kong têa ‘na tơdroăng tơdjâk hyôh kong prâi, tơdjâk kân ‘na hyôh kong prâi hơ’lêh ƀă Việt Nam, Ngế pro xiâm hnê ngăn tơnêi têa tối nhên pá môi hdroh nếo mâu tơdroăng tơhrâ dêi dế Việt Nam tung hbrâ ví hyôh kong prâi hơ’lêh.

Kăn xiâm chêh tôm xo rơkong Khu lâp kong têa khĕn kơdeăn khât tơdroăng ki veăng kum dêi Việt Nam ƀă mâu tơdroăng lâp plâi tơnêi, tung mê ai tá tơdroăng hbrâ ví ƀă Hyôh kong prâi hơ’lêh. Pôa António Guterres tối vâ veăng kum Việt Nam tung pơla pơ’lêh ‘na cheăng kâ ngiât lĕm, tơtro, mơnhông mơdêk on tơhrik ki ‘mâi pro, kum Việt Nam ƀă mâu kong têa tung kơpong kroăng Mekong tơleăng mơnhên mâu tơdroăng ‘na tơnêi tơhnâp trâu, têa xăng po lân, hơ’lêh tơdroăng pêi cheăng kâ, xúa kơnhŏng têa lĕm krá tơniăn ƀă kring tơniăn kế kâ.

Gương tơplôu ƀă tơbleăng