VOV4.Sêdang - Hâi lơ 4/11, tiô chôu kong têa, xuân tung rôh lăm pôu păng ‘nâng Kŏng hòa Pơhlăng, pôa Phạm Minh Chính, Ngế pro xiâm hnê ngăn Chin phuh hiăng tơpui tơno ƀă pôa Emmanuel Macron, kăn xiâm pơkuâ kong têa Pơhlăng. A rôh tơpui tơno, péa ngế kăn xiâm pơkuâ tối nhên kal ‘mâi mơnhông tâ nếo tơdroăng tơrŭm cheăng kâ, tê mơdró ƀă ‘no liăn cheăng tung tơrŭm cheăng la ngiâ Việt Nam – Pơhlăng, rơtế môi tuăn mâu túa pơkâ ƀă troăng hơlâ tơrŭm cheăng tung la ngiâ vâ pro tơ’lêi hlâu tâ nếo ăm tơdroăng tơpui tơno tê mơdró pơla péa tơnêi têa, tŏng kum mâu khu mơdró kâ, kế tơmeăm dêi péa tơnêi têa châ mot tê tung kơchơ tê mơdró dêi rơpó; môi tuăn mơdêk mâu tơdroăng tơkêa tơrŭm cheăng tung mâu kơvâ cheăng ki xiâm môi tiah troăng prôk, pơto chơ tơmeăm, hngêi trăng, troăng klông, pêi chiâk deăng, kong prâi,on tơhrik.

            Tâi tâng a tíu pôa Phạm Minh Chính, Ngế pro xiâm hnê ngăn tơnêi têa ƀă Ngế pro xiâm hnê ngăn kong têa Pơhlăng

Péa pâ môi tuăn tối tơbleăng ƀă xúa tơƀrê mâu tơdroăng tơkêa tê mơdró tơniăn krê Việt Nam – EU (EVFTA) tơdrêng amê hnối mơdêk kĭ pơkâ tơrŭm rak vế ‘no liăn cheăng Việt Nam - EU (EVIPA), pro ivá ăm tơrŭm cheăng kâ tê mơdró ƀă ‘no liăn cheăng pơla Việt Nam ƀă Pơhlăng ƀă EU.

Katarina Nga tơplôu ƀă tơbleăng