VOV4.Sêdang - Kơxo lơ 15/10, pôa Trần Tuấn Anh, Kăn xiâm pơkuâ cheăng kâ tơnêi têa hiăng tơdah ƀă pêi cheăng mơ’no tơdrêng tung um tiô troăng măng Internet ƀă Khu râ kăn pơkuâ tê mơdró kong têa Mih – ASEAN dó inâi USABC. A roh pêi cheăng, péa pâ hiăng tơpui tơno mâu tơdroăng ‘na troăng pơkâ pêi, troăng hơlâ mơnhông cheăng kâ – rêh ối pơlê pơla dêi Việt Nam, mâu tơdroăng pâ thế, pơkâ thế tung mâu kơvâ ki mâu khu tê mơdró Mih tơmâng môi tiah khăm pơlât, on tơhrik, pêi chiâk deăng, liăn ngân, cheăng kâ xúa kơmăi kơmok, khoa hok kŏng ngê̆, tơdroăng tŏng kum khu tê mơdró pro tơniăn ƀă mơnhông mơdêk klêi kơ’nâi pơreăng kân ƀă hía hé.

A tíu pêi cheăng

Pôa Trần Tuấn Anh pơkâ thế mâu ngế tê mơdró Mih pơtối po rơdâ kân tâ mê nếo tơdroăng tê mơdró mơ’no liăn cheăng a Việt Nam, tơrŭm ƀă mâu khu tê mơdró Việt Nam tung mâ kơvâ peăng Mih ai tơmeăm mơnhông mơdêk ó rơdêi ƀă Việt Nam kal vâ, veăng kum tung tơdroăng mơnhông cheăng kâ klêi kơ’nâi pơreăng kân.

Khu râ kăn pêi cheăng Khu râ kăn pơkuâ tê mơdró Mih – ASEAN mơnhên tơkêa kô pơtối rơtế ƀă tơrŭm krá tơniăn ƀă Đảng, Chin phuh Việt Nam, thăm tơrŭm cheăng kâ – tê mơdró – mơ’no liăn cheăng pơla Mih ƀă Việt Nam rế hía rế mơnhông mơdêk.

A Sa Ly tơplôu ƀă tơbleăng