VOV4.Xơ Đăng - Kơxo lơ 23/12, Khu xiâm pơtâng tối tơdroăng cheăng kal kí Tơnêi têa tơkŭm po Hneăng hôp lâp tơnêi têa mơgêi tơdroăng pơtâng tối tơdroăng cheăng kal kí hơnăm 2021 ƀă pêi pro hnoăng cheăng hơnăm 2022. Hneăng hôp châ tơkŭm po tiô troăng mơ’no tơdrêng tung um tiô troăng măng Interet a mâu tíu tâ phĭu tung lâp tơnêi têa. Hơnăm 2021 ƀă tơdroăng hbrâ xêh, mơ-eăm khât, pêi tiô hnê mơhno dêi Khu xiâm kal kí, Khu pơkuâ hnê ngăn cheăng Đảng ƀă khu râ kăn pơkuâ cheăng Đảng, tâi tâng kơvâ pơtâng tối tơdroăng cheăng kal kí hiăng pơ’lêh nếo troăng pêi, pêi pro tŭm têk mâu kơvâ pêi cheăng, kêi đeăng hnoăng cheăng.

Pôa Võ Văn Thưởng, Kăn xiâm hnê mơhno má môi tơdroăng cheăng Đảng xông tơpui a hneăng hôp

Ing mê, kum kal khât pêi pro ƀlêi trâng mâu hnoăng cheăng kal kí dêi mâu khu râ kăn pơkuâ cheăng Đảng, khu râ kăn pơkuâ, Măt trâ̆n Tơnêi têa ƀă mâu khu cheăng kal kí – rêh ối pơlê pơla. Xông tơpui a hneăng hôp, pôa Võ Văn Thưởng, Kăn xiâm hnê mơhno má môi tơdroăng cheăng Đảng pơkâ thế, tung la ngiâ kơvâ hnê hriâm kal pơtối pơ’lêh nếo, mơdêk tơdroăng châ tơƀrê tung pơtâng tối a mâu khu râ.

Thăm veăng mơjiâng Đảng ó rơdêi ‘na kal kí, troăng tơmiât, hiâm mơno. Pôa Võ Văn Thưởng pơkâ thế thăm pêi pro tơdroăng hriăn plĕng, hlê plĕng pêi pro, pơtâng tối, po rơdâ pêi pro Pơkâ Hneăng hôp má 13 ƀă mâu pơkâ, pơkâ dêi khu râ kăn mơgêi tối pơkâ dêi Đảng.

A Sa Ly tơplôu ƀă tơbleăng