VOV4.Sêdang - Hâi lơ 17/9, pôa Vũ Đức Đam, Ngế pro xiâm phŏ hnê ngăn Chin phuh ƀă kăn pơkuâ mâu khu xiâm, kơvâ cheăng Tơnêi têa hiăng troh pêi cheăng hnê mơhno hnoăng cheăng hbrâ mơdât pơreăng COVID-19 a kong pơlê Tiền Giang. Tơpui a rôh pêi cheăng, pôa Vũ Đức Đam tơmâng xo mâu tơdroăng ki mơ-eăm dêi rêm râ, mâu kơvâ cheăng, tơring, cheăm dêi kong pơlê Tiền Giang tung tơdroăng ki hbrâ mơdât pơreăng COVID-19 tung kong pơlê pơla hdrối kố nah; malối cho tơdroăng ki tơbleăng mâu kơxô̆ liăn tŏng kum, rêh ối pơlê; tơdrêng amê hnối tơmâng mâu rơkong ki pâ thế dêi kong pơlê.

Pôa Vũ Đức Đam hiăng mơhno tối mâu tơdroăng ki pêi pro tá hâi châ tơƀrê, ối kơdrâ tung hnoăng cheăng hbrâ mơdât pơreăng ki kong pơlê Tiền Giang kal tơmâng ngăn, tŏng kum pêi pro tung la ngiâ vâ rĕng kâi hbrâ mơdât pơreăng. Ƀă mâu kơpong ki hiăng tah tơdroăng ki mơdât mot lo athế pơtối rak ngăn krá, pơtối séa ngăn tơdroăng ki ôh tá tơniăn dêi pơreăng vâ vêh ƀă tơdroăng ki tiah hmâ.

Katarina Nga tơplôu ƀă tơbleăng