VOV4.Sêdang - Kơxê lơ 14/9, a tíu pêi cheăng Chin phuh, pôa Vũ Đức Đam, Ngế pro xiâm phŏ hnê ngăn tơnêi têa pơkuâ roh hôp ƀă mâu khu xiâm kơvâ cheăng ƀă mâu ngế rơkê ngăn pơkeăng ƀă khăm pơlât ‘na tơdroăng hriăn plĕng, hnê pơcháu kŏng ngê̆, mơnuá pâk, mơjiâng pro pơkeăng, vaccine hbrâ mơdât COVID-19. A roh hôp, kăn teăng mâ Khu xiâm ngăn pơkeăng ƀă khăm pơlât tối ăm ‘nâi, tiô tối hdrối hâi kố lơ 15/9 kô rơtế Hô̆i đong hnê mơhno pro ăm mơ-éa kĭ tơkŭm po hôp vâ séa ngăn pro ăm mơ-éa phêp ƀă vaccine Nanocovax.

Xông tơpui a roh hôp, pôa Vũ Đức Đam pơkâ Khu xiâm pơkuâ ngăn pơkeăng ƀă khăm pơlât pơkuâ roh hôp ƀă Hô̆i đong Hiâm mơno lĕm Tơnêi têa ƀă Hô̆i đong Hnê mơhno pro ăm mơ-éa kĭ vâ tơpui tối pơkâ thế ‘na vaccine COVID-19. Pôa Vũ Đức Đam pơchân tối Khu xiâm pơkuâ ngăn pơkeăng ƀă khăm pơlât rĕng kêi đeăng tơdroăng mơnúa pâk ƀă tơleăng tơdroăng ‘na hnoăng pơkuâ pơkeăng Molnupiravir pơlât COVID-19.

A Sa Ly tơplôu ƀă tơbleăng