VOV4.Xơ Đăng - Khu xiâm ngăn troăng prôk ƀă rơxế kơtâu, Khu xiâm ngăn tơƀai ƀă mâu khu xiâm, kơvâ cheăng ki ai tơdjâk troh tối tơbleăng mâu kăn pơkuâ, pơkâ mơdêk hnoăng cheăng hbrâ vâ vêh lôu péa mâu troăng kơneăng ƀă kong têa ê, ai pơkâ vâ mơngế Việt Nam a kong têa pơkâ roê tíu vâ vêh ngi dêi tơnêi têa, rĕng tŏng kum ƀă pro tơ’lêi hlâu má môi tơdroăng ki rơhêng vâ vêh dêi tơnêi têa dêi kuăn pơlê.

Kố cho rơkong pơkâ thế dêi pôa Vũ Đức Đam, Ngế pro xiâm phŏ hnê ngăn tơnêi têa, kăn phŏ Khu pơkuâ hnê mơhno cheăng Tơnêi têa hbrâ mơdât pơreăng COVID-19 a rôh pêi cheăng ƀă Khu xiâm ngăn pơkeăng ƀă khăm pơlât ƀă mâu khu xiâm, kơvâ cheăng ki ai tơdjâk ‘na tơdroăng ki mơngế Việt Nam a kong têa ê, mơngế kong têa ê ki mot tung Việt Nam po a kơxê lơ 8/12.

Ing rơkong tơpui dêi mâu khu xiâm kơvâ cheăng, pôa Vũ Đức Đam, Ngế pro xiâm hnê ngăn tơnêi têa tối nhên: pakĭng tơdroăng ki rơhêng vâ tơdah khu ki rơkê, kih sư, mâu ngế pêi cheăng ‘na kih thuât rơkê cho mơngế kong têa ê, tơmối kong têa ê kum mơnhông mơdêk cheăng kâ rêh ối pơlê pơla, mâu khu xiâm, kơvâ cheăng kal malối tơtrŏng troh tơdroăng ki rơhêng vâ vêh dêi ngi tơnêi têa dêi kuăn pơlê Việt Nam lăm pêi cheăng, hriâm tâp, pêi cheăng, lăm pôu nhŏng o tro kreăng a kong têa ê xua pơreăng, xuân môi tiah vâi krâ nhŏng o Việt nam ki rêh ối a kong têa ê rơtế ƀă mâu nhŏng o vâi châ xúa tơdroăng tŏng kum môi tiah mơngế Việt Nam tiô pơkâ.

Katarina Nga tơplôu ƀă tơbleăng