VOV4.Xơ Đăng - Kơxo lơ 1/12, a Hà Nội po Hneăng hôp Khu kăn lâp tơnêi têa Khu hnê mơhnhôk hriâm Việt Nam rôh má 6 ƀă tơbâ 25 hơnăm mơjiâng Khu. Pôa Vũ Đức Đam, Ngế pro xiâm phŏ hnê ngăn tơnêi têa troh veăng hôp. 25 hơnăm hdrối nah, Khu hnê mơhnhôk hriâm Việt Nam hiăng ôh tá la lâi pơtê hơ’lêh nếo, mơhnhôk veăng tơlo mâu liăn ngân mơnhông Khu hnê mơhnhôk hriâm, diâp lối rơtuh hnoăng liăn hriâm rơkê ăm vâi hdrêng, mâu thái cô ƀă hok tro, kum hok tro kơtiê mơ-eăm hriâm tâp. A rôh hôp, pôa Vũ Đức Đam tối nhên, tung pơla hdrối kố nah, hnê hriâm a rêm râ tíu hriâm rế hía rế châ hơ’lêh rêm râ a kong têa ê, tơdroăng mê ăm hlo tâi tâng Đảng ƀă kuăn pơlê hiăng tơmâng ngăn troh tơdroăng ki hriâm.

Pôa Vũ Đức Đam, Ngế pro xiâm phŏ hnê ngăn tơnêi têa pơkâ thế: Khu hnê mơhnhôk hriâm Việt Nam tơrŭm ƀă mâu Khu xiâm pêi klêi mâu tơdroăng vâ pêi pro hơ’lêh nếo tâi tâng tung hnê hriâm ki Đảng hiăng mơ’no. Pôa Vũ Đức Đam loi tơngah ƀă tơdroăng ki pơtó ƀă mơnhông, Khu kô pơtối kân rơdêi ƀă veăng kum kal khât tung tơdroăng cheăng mơjiâng ƀă rak vế Tơnêi têa.

Katarina Nga tơplôu ƀă tơbleăng