VOV4.Sêdang - Tiô rơkong krếo thế dêi jâ Anu Vehviläinen, Kăn xiâm hnê ngăn Kuô̆k hô̆i Phần Lan, mê pôa Vương Đình Huệ, kăn xiâm hnê ngăn Kuô̆k hô̆i tơnêi têa pin ƀă Khu kăn xiâm Kuô̆k hô̆i Việt Nam hiăng lăm pôu păng ‘nâng Kŏng hòa Phần Lan sap ing hâi lơ 10 – 11/9. Kơxo lơ 10/9, a pơlê kong xiâm Helsinki, jâ Anu Vehviläinen, Kăn xiâm hnê ngăn Kuô̆k hô̆i Phần Lan hiăng pơkuâ leh tơdah kơ pôa Vương Đình Huệ. Klêi kơ’nâi leh tơdah, pôa Vương Đình Huệ, kăn xiâm hnê ngăn Kuô̆k hô̆i prếi jâ Anu Vehviläinen, kăn xiâm hnê ngăn Kuô̆k hô̆i Phần Lan ƀă khu kăn xiâm Kuô̆k hô̆i péa tơnêi têa po tơpui tơno.

Kăn xiâm hnê ngăn Kuô̆k hô̆i tơnêi têa Việt Nam prế Kăn xiâm hnê ngăn Kuô̆k hô̆i Phần Lan

Tung rôh tơpui tơno, péa pâ tối tiah kố, tơrŭm cheăng pơla Kuô̆k hô̆i péa tơnêi têa châ rak vế tơniăn lĕm khât ing tơdroăng pơtroh mâu khu kăn xiâm ƀă mâu Kơ koan dêi Kuô̆k hô̆i. Kuô̆k hô̆i péa pâ xuân kal tơrŭm ai rơkong tơpui ƀă veăng kum kal tung tơrŭm pơla EU ƀă ASEAN xuân môi tiah mâu tơdroăng pơkâ ki péa tơnêi têa cho ngế tơrŭm cheăng, ƀă tung mâu tơdroăng ki péa pâ rơtế vâ ‘nâi plĕng tơdjuôm môi tiah hnoăng cheăng dêi troăng hơlâ ki kơvâ cheăng vâ mơdêk hơniâp lĕm, hnoăng kuăn mơngế ƀă mơnhông mơdêk krá ton.

Katarina Nga tơplôu ƀă tơbleăng