VOV4.Xơ Đăng - Tung tơdroăng pêi cheăng a rôh hôp má péa, Kuô̆k hô̆i hneăng 15,  kơxo lơ 12/11, pôa Phạm Minh Chính, Ngế pro xiâm hnê ngăn Chin phuh hiăng ai 90 phut tiâ mơnhên mâu tơdroăng kơ êng dêi mâu kăn Kuô̆k hô̆i. Kố cho rôh apoăng Ngế pro xiâm hnê ngăn tơnêi têa đăng tơdroăng kơ êng tiâ riân ing to pro kăn. A rôh kơ êng teăng mâ Chin phuh, pôa Phạm Minh Chính, Ngế pro xiâm hnê ngăn tơnêi têa mơnê mâu kăn Kuô̆k hô̆i, kuăn pơlê tung lâp tơnêi têa hiăng môi tuăn ƀă tơmâng khât, veăng hnê tối hên tơdroăng vâ ‘nâi, tối tro khât, hnoăng cheăng’na tối tơbleăng dêi Chin phuh, malối tơdroăng pêi pro tiô pơkâ mơnhông cheăng kâ - rêh ối pơlê pơla hơnăm 2021, tiô tối hdrối pơkâ mơnhông mơnhông cheăng kâ -rêh ối hơnăm 2022 ƀă hlối tối môi tuăn mâu tơdroăng hbrâ mơdât pơreăng kân COVID-19.

Pôa Phạm Minh Chính hiăng tối tơbleăng nhên mâu tơdroăng ki châ mâu kăn Kuô̆k hô̆i ƀă kuăn pơlê tơmâng vâ ‘nâi plĕng, mê cho tơdroăng hbrâ mơdât pơreăng , malối cho pơ’lêh tơdroăng tơchĕng tơmiât, troăng rơhlâ ƀă tơdroăng tơkŭm po hbrâ mơdât pơreăng tiô tơdroăng pơkâ tơniăn, rơkê, ƀĕng ƀeăn kâi mơdât tơ-ƀrê pơreăng COVID-19; ‘na rak tơniăn tung rêh ối pơlê pơla; ‘na luât pơkâ tŏng kum, troăng rơhlâ tŏng kum ‘mâi mơnhông cheăng kâ rêh ối.

Mơgêi péa hâi tơdế kơ-êng ƀă tiâ tơdroăng kơ-êng dêi mâu kăn tung Chin phuh, pôa Vương Đình Huệ, Kăn xiâm hnê ngăn Kuô̆k hô̆i tối hiăng thâ pêi, hlối pêi kơtăng ƀă tơdroăng pơ’lêh nếo; Kuô̆k hô̆i hiăng pê klêi tơdroăng kơ-êng ƀă tiâ ki apoăng dêi hneăng má 15 tung tơdroăng pêi cheăng tro tuăn kuăn pơlê, tơdrăng, mơjiâng ƀă hiăng klêi tơniăn lĕm.

Gương tơplôu ƀă tơbleăng