VOV4.Sêdang - Kơxê lơ 5/9, pôa Vương Đình Huệ, Kăn xiâm hnê ngăn Kuô̆k hô̆i  ƀă khu kăn xiâm Kuô̆k hô̆i tơnêi têa pin hiăng troh a tơriah tơ-ƀai Schwechat,  pơlê kong xiâm Vienna, Cộng hòa Áo veăng Hôp mâu kăn xiâm hnê ngăn Kuô̆k hô̆i lâp plâi tơnêi, lăm pôu pêi cheăng ƀă Khu kăn Kuô̆k hô̆i châu Âu (EP),  kong têa Ƀih bă lăm pôu Kŏng hòa Phần Lan. Tiô pơkâ, klêi lăm pôu Kŏng hòa Áo, pôa Vương Đình Huệ trâm mâ, tơpui tơno ƀă kăn ƀô̆ Teăng mâ Việt Nam a kong têa Áo; teăng mâ kuăn pơlê mơngế Việt Nam a Áo, Czëch, Hungary, Slovakia.

Kăn xiâm hnê ngăn Kuô̆k hô̆i trâm mâ Kăn teăng mâ Việt Nam a kong têa Áo

Kố châ ngăn môi tiah môi rôh trâm mâ kuăn pơlê ki kal phá tơviah dêi Kăn xiâm hnê ngăn Kuô̆k hô̆i ƀă kuăn pơlê mơngế Việt Nam ki rêh ối a kong têa ê. Veăng hôp ƀă mâu Kăn xiâm hnê ngăn lâp plâi tơnêi rôh má 5, a hneăng hôp, pôa Vương Đình Huệ, Kăn xiâm hnê ngăn Kuô̆k hô̆i kô ai ƀai pơchuât tơbleăng tơdroăng kal tơtro ƀă tơdroăng rêh ối ƀă luât pơkâ dêi Việt Nam.

Pakĭng mê, mâu kăn tung khu kăn xiâm Kuô̆k hô̆i Việt Nam xuân veăng a mâu tơdroăng tơpui tơno tơdjâk mâu tơdroăng môi tiah ‘na: Rak tơniăn hyôh kong prâi, pơ’lêh kơxô̆, tơdroăng ôh pá rah pơla kơdrâi ƀă kơnốu, pơcháu hnoăng cheăng pơkuâ ăm vâi kơdrâi ƀă droh rơtăm, mâu tơdroăng ‘na luât lâp plâi tơnêi ƀă hên mâu tơdroăng ki ê tung lâp plâi tơnêi vâ ‘nâi plĕng.

Pakĭng hneăng hôp pôa Vương Đình Huệ ối trâm mâ mâu kăn Kuô̆k hô̆i dêi mâu kong têa, mê cho mâu kong têa ki tơrŭm cheăng ƀă, tơrŭm cheăng tung tŭm tơdroăng xuân môi tiah tơdroăng hmâ tơrŭm dêi Việt Nam. Kố cho rôh ki tơ’lêi vâ tơbleăng tơdroăng dêi Việt Nam troh mâu kăn xiâm dêi mâu kong têa púi vâ dêi Việt Nam, pơtối mơdêk tơrŭm tiah hmâ, xuân tơrŭm tung hên tơdroăng cheăng kâ, tê mơdró, ‘no liăn cheăng, khoa hok, hnê hriâm, kih thuât, xuân môi tiah mơdêk tơrŭm cheăng Kuô̆k hô̆i mâu kong têa.

Gương tơplôu ƀă tơbleăng