VOV4. Xơ Đăng -  Kơxê lơ 15/12 tiô chôu kong têa Ấn Độ, pôa Vương Đình Huệ, Kăn xiâm hnê ngăn Kuô̆k hô̆i ƀă Khu râ kăn xiâm Kuô̆k hô̆i tơnêi têa pin troh tơraih tơƀai cheăng lêng Palam, New Delhi, pơxiâm roh lăm pôu pêi cheăng kong têa Ấn Độ tiô rơkong krếo thế dêi pôa Om Birla, Kăn xiâm hnê ngăn Kuô̆k hô̆i râ má péa kong têa Ấn Độ ƀă pôa Venkaiah Naidu, Kăn xiâm hnê ngăn Kuô̆k hô̆i râ má môi Ấn Độ, sap hâi lơ 15 – 19/12/2021.

Pôa Vương Đình Huệ, Kăn xiâm hnê ngăn Kuô̆k hô̆i lăm pôu pêi cheăng kong têa Kŏng hòa Ấn Độ

Tơdah a tơraih tơƀai ‘na peăng Ấn Độ ai, Kăn pơkuâ Vi ƀan tơpui kâ dêi pôa Shri P P Chaudhary, Kăn xiâm hnê ngăn péa Kuô̆k hô̆i rơtế ƀă mâu Kăn Kuô̆k hô̆i râ má môi, râ má péa, khu râ kăn pơkuâ ƀơrô Kuô̆k hô̆i, kăn ƀô̆ tơdah tơmối Ƀơrô Kuô̆k hô̆i Ấn Độ.

Drêng lăm pôu pêi cheăng Ấn Độ roh kố, pôa Vương Đình Huệ kô tơpui tơno ƀă Kăn xiâm hnê ngăn Kuô̆k hô̆i râ má péa Ấn Độ, trâm mâ tơpui tơno Kăn xiâm hnê ngăn Kuô̆k hô̆i râ má môi, Kăn xiâm phŏ hnê ngăn kong têa Ấn Độ ƀă Ngế pro xiâm hnê ngăn kong têa Ấn Độ, tơdah Kăn xiâm pơkuâ hnê ngăn Đảng Kŏng san Ấn Độ, veăng leh tơbâ 5 hơnăm tơrŭm cheăng ton xŏn tŭm têk Việt Nam - Ấn Độ, lăm pôu tíu mơđah tơbleăng um 50 hơnăm tơrŭm cheăng peá tơnêi têa Việt Nam - Ấn Độ, tơdah kăn pơkuâ mâu khu tơrŭm cheăng ƀă pú hmâ dêi Việt Nam, veăng hneăng hôp tơpui tơno khu tê mơdró.

A Sa Ly tơplôu ƀă tơbleăng