VOV4.Xơ Đăng - Kơxo lơ 30/11, pôa Vương Đình Huệ, kăn xiâm hnê ngăn Kuô̆k hô̆i pơkuâ po rôh pêi cheăng ƀă Khu pơkuâ Vi ƀan cheăng kâ ƀă khu ki rơkê plĕng, khu ki hriăn ‘na troăng hơlâ liăn ngân, liăn tŏng kum pêi pro Tơdroăng ‘mâi mơnhông ƀă mơnhông cheăng kâ rêh ối pơlê pơla.

Tơdroăng pơkâ dêi Hneăng hôp kố cho vâ veăng kum pêi pro nhên tơ’nôm mâu tơdroăng hriăn ngăn khoa hok ƀă tơdroăng ki ai khât vâ rơtế ƀă Chin phuh kơchuâ chêh môi kơxô̆ liăn pơkâ, liăn vâ pêi pro hơ’lêh troăng hơlâ, mơgêi dêi Tơnêi têa a Rôh hôp Tơnêi têa 4, Hneăng má 13 ƀă tơdroăng pơkâ Hneăng hôp má 2, Kuô̆k hô̆i hneăng má 15 ‘na tơdroăng cheăng tung la ngiâ tâi tâng hbrâ mơdât pơreăng COVID-19, ‘mâi mơnhông cheăng kâ, tơtro tơniăn ƀă mâu tơdroăng ki tâ tú dêi pơreăng.

Nôkố Chin phuh hiăng kơchuâ chêh Tơdroăng tơkêa mơjiâng troăng hơlâ, troăng hơlâ liăn ngân, liăn vâ tŏng kum tơdrêng tơbleăng tơdroăng tâi tâng ‘mâi mơnhông ƀă mơnhông cheăng kâ rêh ối.

Katarina Nga tơplôu ƀă tơbleăng