VOV4.Xơ Đăng - Klăng roh pôa Hosoda Hiroyuki châ rah xo to pro Kăn hnê ngăn Kuô̆k hô̆i râ má péa kong têa Nhuk, pôa Vương Đình Huệ, Kăn xiâm hnê ngăn Kuô̆k hô̆i hiăng pơtroh kơthô rơkâu. Tung kơthô, pôa Vương Đình Huệ tối phiu ro hlo, ƀă tơdroăng mơ-eăm tơdjuôm dêi péa pâ, tơrŭm cheăng ‘’Khu tơrŭm ton xŏn trâu hơngế xua hơniâp lĕm ƀă kro mơdrŏng a châu Á’’ pơla Việt Nam ƀă Nhuk rế hía rế mơnhông mơdêk ƀă châ tơƀrê tung rêm kơvâ cheăng; tơdrêng amê loi tơngah, pôa Hosoda Hiroyuki kô kêi đeăng hôm păng ‘nâng hnoăng cheăng ki kân dêi tơná, kum djâ kong têa Nhuk pơtối mơnhông mơdêk krá tơniăn.

Kăn xiâm hnê ngăn Kuô̆k hô̆i pói tơngah rĕng châ trâm Kăn xiâm hnê ngăn Kuô̆k hô̆i râ má péa kong têa Nhuk vâ rơtế tơpui tơno ‘na troăng tơrŭm cheăng pơla péa tơnêi têa ƀă pơla Kuô̆k hô̆i Việt Nam ƀă Kuô̆k hô̆i râ má péa kong têa Nhuk tung la ngiâ.

A Sa Ly tơplôu- tơbleăng