VOV4. Xơ Đăng - Klăng roh jâ Marketa Pakarová Adamova châ rah xo pro Kăn xiâm hnê ngăn Kuô̆k hô̆i râ má péa Czëch, pôa Vương Đình Huệ, Kăn xiâm hnê ngăn Kuô̆k hô̆i hiăng pơtroh kơthô rơkâu. Tung kơthô, pôa Vương Đình Huệ tối phiu ro hlo tơrŭm cheăng tiô khôi hmâ vâi krâ nah ƀă tơrŭm hên tơdroăng pơla Việt Nam – Czëchtung pơla kố nah pơtối mơnhông mơdêk ó rơdêi, trâu hơngế; tơrŭm pơla Kơ koan mơjiâng luât péa tơnêi châ pơtối rak, thăm mơnhông tŭm têk pơla péa pâ.

Tung la ngiâ, pôa Vương Đình Huệ pói vâ rơtế Kăn xiâm hnê ngăn Kuô̆k hô̆i râ má péa Kŏng hoa Czëchpơtối tơrŭm krá tơniăn, thăm tơrŭm cheăng lĕm tro pơla péa tơnêi têa, péa Kơ koan mơjiâng pro luât rế hía rế trâu hơngế, krá tơniăn, châ tơƀrê, xua pơxúa tơdjuôm dêi kuăn pơlê péa tơnêi têa, xua hơniâp lĕm, tơniăn, mơnhông tơtêk krá tơniăn dêi kơpong ƀă lâp plâi tơnêi.

A Sa Ly tơplôu ƀă tơbleăng