VOV4.Xơ Đăng - A pơlê kong xiâm New Dehli, pôa Vương Đình Huệ, kăn xiâm hnê ngăn Kuô̆k hô̆i tơnêi têa pin hiăng tơdah pôa Jaishankar, ngế xiâm tơpui kâ kong têa Ấn Độ. A rôh tơdah, pôa Vương Đình Huệ tối nhên, Việt Nam đi đo ngăn nhuô̆m tơrŭm cheăng la ngiâ tung tâi tâng ƀă Ấn Độ, phiu ro Ấn Độ ngăn Việt Nam cho kơjo kum tung troăng hơlâ pêi pro tro peăng mâ hâi lo dêi tơná. Péa pâ môi tuăn tơrŭm cheăng la ngiâ tâi tâng pơla Việt Nam ƀă Ấn Độ dế mơnhông tơniăn lĕm tung tâi tâng hơnăm xiâm kal kí - tơpui kâ, gak kring-pơlê pơla cheăm bêng, cheăng kâ-tê mơdró-‘no liăn cheăng, khoa hok kong ngĕ, mơhno túa lĕm tro, tơ’noăng ivá ôm hyô, trâm mâ kuăn pơlê.

Péa ngế kăn xiâm pơkuâ hiăng tơpui ‘na mâu tơdroăng tung kơpong, a kong têa ê ki péa pâ rơtế vâ ‘nâi plĕng, tung mê ai tơrŭm cheăng ASEAN - Ấn Độ ƀă tơdroăng ki achê kố a Biển Đông, tối nhên Việt Nam - Ấn Độ kô pơtối tŏng kum môi tuăn ƀă mâu ivá mơ-eăm mơdêk tơdroăng ki tơleăng mơnhên mâu tơdroăng ki ôh tá môi tuăn ing mâu troăng hơlâ pro hơniâp lĕm, tơtro ƀă Luât lâp plâi tơnêi pơkâ, xua hơniâp lĕm, tơrŭm, tơniăn ƀă mơnhông tung kơpong ƀă a kong têa.

Katarina Nga tơplôu ƀă tơbleăng