VOV4.Xơ Đăng - Kơxo lơ 13/12, tiô chôu kong têa Hàn Quốc, tung roh lăm pôu pêi cheăng kong têa Hàn Quốc, pôa Vương Đình Huệ, Kăn xiâm hnê ngăn Kuô̆k hô̆i hiăng tơdah mâu Grup pơkuâ, khu tê mơdró ki má môi dêi Hàn Quốc. A roh tơdah mâu grup pơkuâ, pôa Vương Đình Huệ tối nhên, Việt Nam ƀă Hàn Quốc dế mơ-eăm djâ tơrŭm cheăng péa pâ to a hngêi tâ klăng leh tơbâ 30 hơnăm mơjiâng tơrŭm tơpui kâ.

Pôa Vương Đình Huệ, Kăn xiâm hnê ngăn Kuô̆k hô̆i tơdah mâu khu tê mơdró Hàn Quốc

Tơrŭm cheăng kâ cho môi tơdroăng ki kal xua mê tung roh lăm pôu pêi cheăng roh kố ăm hlo tơdroăng mơ-eăm thăm tơrŭm cheăng kâ, tê mơdró pơla péa tơnêi têa châ pơkâ 100 rơtal dollars a hơnăm 2023. A roh tơdah khu râ Grup pơkuâ Samsung Electronics, pôa Vương Đình Huệ tối ăm ‘nâi, Việt Nam môi tuăn pơkâ po rơdâ mơ’no liăn tê mơdró dêi Kŏng ti tung la ngiâ; kheăn kơdeăn pơkâ tŏng kum khu tê mơdró Việt Nam tung tơdroăng mơjiâng tơmeăm tŭm ăm lâp plâi tơnêi dêi Samsung; tơdrêng amê, pơkâ thế Kŏng ti ai troăng pêi ton xŏn ƀă troăng pêi ki nhên vâ tŏng kum mâu khu tê mơdró Việt Nam mơdêk ivá mơjiâng pro ƀă tơbriât vâ ai ivá veăng tung tơdroăng mơjiâng pro tơmeăm lâp plâi tơnêi dêi Grup pơkuâ Samsung ƀă Kŏng ti tối krê.

A Sa Ly tơplôu ƀă tơbleăng