VOV4.Sêdang - Tung roh lăm pôu pêi cheăng a kong têa Phần Lan, pôa Vương Đình Huệ, Kăn xiâm hnê ngăn Kuô̆k hô̆i hiăng trâm mâ tơpui tơno ƀă jâ Sanna Marin, Ngế pro xiâm hnê ngăn kong têa Phần Lan. Jâ Sanna Marin mơnhên, Việt Nam cho môi tung mâu khu tơrŭm cheăng ki kal  dêi Phần Lan tung ASEAN ƀă a Châu Á – Thái Bình Dương, péa tơnêi têa hiăng tơrŭm cheăng châ tơƀrê ‘na cheăng kâ, hnê hriâm, tơrŭm mơnhông mơdêk, kong prâi.

Péa Kăn xiâm pơkuâ xuân tơpui tơno ‘na tơrŭm tung hên troăng, mơnhên péa tơnêi têa pơrá veăng ƀă ai hnoăng hôm păng ‘nâng a EU ƀă ASEAN, kal pơtối rak tơrŭm ƀă tŏng kum dêi pó, veăng tung tơdroăng mơ-eăm tơdjuôm tơdjêp ASEAN – EU, kum thăm tơrŭm ton xŏn ASEAN – EU nếo châ mơjiâng.

A Sa Ly tơplôu ƀă tơbleăng