VOV4.Sêdang - Kơxê lơ 6/9, pôa Vương Đình Huệ, kăn xiâm hnê ngăn Kuô̆k hô̆i hiăng ai rôh trâm pôa Duarte Pacheco, kăn xiâm hnê ngăn Khu tơrŭm Kuô̆k hô̆i lâp plâi tơnêi (IPU). Kăn xiâm hnê ngăn Kuô̆k hô̆i tơnêi têa pin tối mơnhên, tơdroăng ki veăng hôp a mâu tơdroăng hôp dêi IPU cho môi hnoăng cheăng ki kal tung tơpui kâ Kuô̆k hô̆i ki hên kơvâ cheăng dêi Việt Nam vâ mơdêk ƀă rak vế mâu tơdroăng ki pơxúa, mơhno tối hiâm mơno tơnêi têa ‘na mâu tơdroăng ki tơmâng ngăn tơdjuôm tung lâp plâi tơnêi. Kăn xiâm hnê ngăn Kuô̆k hô̆i tơnêi têa pin tối 3 tơdroăng ki pơkâ mơ’no vâ IPU chiâng môi khu tơrŭm cheăng tơƀrê tâ nếo.

Tối môi tuăn ƀă tơpui tơno tơdrêng, nhên vâ tối tơbleăng ki tơchĕng tơmiât dêi Việt Nam, tung mê, ai tơdroăng ki tơkŭm po mâu rôh hôp ki kal, rôh hôp kơpong ‘na ‘mâi mơnhông cheăng kâ, rôh hôp lâp plâi tơnêi mâu kăn Kuô̆k hô̆i hơnăm ối nếo ƀă hên ki ê pơla mâu rôh hôp kân IPU.

Katarina Nga tơplôu ƀă tơbleăng