VOV4.Sêdang -  A pơlê kong xiâm Bruxelles, kong têa Ƀih, pôa Vương Đình Huệ, Kăn xiâm hnê ngăn Kuô̆k hô̆i hiăng trâm mâ tơpui tơno ƀă pôa Charles Michel, Kăn xiâm hnê ngăn Hô̆i đông châu Âu. Mơnhên roh lăm pôu ƀă pêi cheăng a EU roh kố dêi khu râ kăn xiâm Kuô̆k hô̆i Việt Nam klêi kơ’nâi môi pơla ton tơdjâk xua pơreăng kân, Kăn xiâm hnê ngăn EC tối, pơreăng COVID-19 xông tâ tú ó tung lâp plâi tơnêi hiăng tơdjâk troh tơdroăng cheăng ƀă ki châ tơƀrê dêi tơdroăng pêi pro pơkâ EVFTA; tối nhên la ngiâ péa pâ kal pêi pro tâi tâng tơmeăm ki ai hlâu kân kĭn ki pơkâ kố djâ ăm.

Pôa Charles Michel tối troăng tơmiât pêi ‘na hơniâp lĕm ƀă gak kring a Ấn Độ Dương – Thái Bình Dương, pơkâ nhuô̆m luât ƀă mơnhên EU pói vâ po rơdâ ƀă pêi trâu hơngế tâ tơrŭm cheăng ƀă kơpong peăng mâ hâi lo pá hdroh châu Á tung mê ai Việt Nam. Pôa Vương Đình Huệ mơnhên, Việt Nam pơtối tơrŭm krá tơniăn ƀă EU ƀă EP a mâu tơdroăng ki tơrŭm hên troăng; hbrâ pro kông tơdjêp thăm mơnhông tơrŭm cheăng EU – ASEAN tơxâng tung Khu tơrŭm cheăng ton xŏn ASEAN-EU nếo kĭ.

A Sa Ly tơplôu ƀă tơbleăng