VOV4.Xơ Đăng - Klăng hâi Thái cô Việt Nam lơ 20/11, kơxê lơ 19/11, pôa Vương Đình Huệ, Kăn xiâm hnê ngăn Kuô̆k hô̆i hiăng veăng leh pơxiâm po hơnăm hriâm 2021 – 2022 ƀă trâm mâ, pâ mơnê mâu thái cô a Hngêi trung Đăi hok Y Hà Nội. Teăng mâ khu râ kăn pơkuâ Đảng, Tơnêi têa, pôa Vương Đình Huệ  tơpui ‘na tơdroăng pâ mơnê, kheăn kơdeăn mâu tơdroăng veăng kum kân dêi khu kăn ƀô̆, ƀok thái pơkeăng, mâu ngế cheăng tung hngêi pơkeăng, mâu thái yăo, cô yăo ƀă sinh viên hngêi trung; mâu ngế hiăng ôh tá bê tơmâng rơ-iô, hbrâ pleăng dêi châ chăn ivá dêi tơná, lăm a mâu tíu ai pơreăng, pleăng tâi ivá tơná, rak vế ivá, châ chăn ƀă tơdroăng rêh ối tơniăn lĕm dêi Kuăn pơlê.

Pôa Vương Đình Huệ, Kăn xiâm hnê ngăn Kuô̆k hô̆i trâm mâ, pâ mơnê mâu thái cô hnê hngêi trung Đại học Y Hà Nội

Tiô tối hdrối, pơreăng kân COVID-19 ối xông tâ tú ó, ôh tá ‘nâi tối hdrối, laga ƀă tơdroăng tơdjuôm ivá, môi hiâm mơno dêi tâi tâng hdroâng mơngế, ƀă hiâm mơno krá chân ƀă khên tơnôu mơ-eăm ƀă mâu túa ki rơkê tơtro dêi khu ƀok thái pơkeăng, tơdroăng ki veăng dêi tâi tâng khu cheăng kal kí, pôa Vương Đình Huệ loi tơngah khât, tơnêi têa kô rĕng mơdât tâi tâng pơreăng, rak vế ivá châ chăn dêi kuăn pơlê, pro tơniăn ƀă mơnhông cheăng kâ – rêh ối pơlê pơla.

A Sa Ly tơplôu ƀă tơbleăng