VOV4.Sêdang - Tung hâi lơ 9/9 tiô chôu tơnêi têa pin, pôa Vương Đình Huệ, kăn xiâm hnê ngăn Kuô̆k hô̆i ƀă khu kăn xiâm Kuô̆k hô̆i Việt Nam hiăng veăng hôp a rôh hôp Khu mơdró kâ Việt Nam - Ƀih. Tơpui ƀă mâu khu mơdró kâ xiâm dêi Ƀih, pôa Vương Đình Huệ mơnhên tối khât ki tơmiât tơkŭm po rôh tơpui tơno, ngăn kố cho rôh tơ’lêi tro vâ rơtế ƀă dêi rơpó ‘na mâu troăng ki ‘no liăn cheăng nếo, troăng hơlâ hơ’lêh nếo tơdroăng ki ‘no liăn cheăng dêi Việt Nam.

Tơdrêng a mê hnối mơ’no tối mâu tơdroăng ki pơkâ mơ’no vâ mơdêk tơƀrê tơrŭm cheăng, pêi pro troh tơdroăng ki tơƀrê dêi mâu khu mơdró kâ Ƀih drêng ‘no liăn cheăng ƀă tê mơdró a Việt Nam. Vâ mơdêk tâ nếo tơrŭm cheăng kâ, tê mơdró, ‘no liăn cheăng pơla Việt Nam ƀă kong têa Ƀih tung la ngiâ, xúa mâu rôh tơ’lêi hlâu nếo klêi kơ’nâi pơreăng kân COVID-19, kăn xiâm hnê ngăn Kuô̆k hô̆i Vương Đình Huệ hiăng tối troh mâu tơdroăng pơkâ tung la ngiâ.

Tung mê, pơkâ thế khu mơdró kâ ƀă mâu Khu tơrŭm ngăn khu mơdró kâ Ƀih môi tuăn rơdêi vâ Kuô̆k hô̆i Ƀih rĕng pêi klêi mâu hlá mơ-éa pêi pro troh tơdroăng kĭ pơkâ tơkêa Rak vế ‘no liăn cheăng pơla Việt Nam ƀă EU (EVIPA) tung pơla rĕng má môi. Séa ngăn po troăng kơneăng tơdrăng tơdjêp pơla Ƀih ƀă Việt Nam vâ mơdêk mâu tơdroăng tơrŭm cheăng kâ, ôm hyô, hnê hriâm, trâm mâ kuăn pơlê kum péa tơnêi têa achê ƀă dêi rơpó tâ drêng pơreăng kân châ hbrâ mơdât.

Katarina Nga tơplôu ƀă tơbleăng