VOV4.Xơ Đăng - Kơmăng lơ 5/12, Khu xiâm pơkuâ tơdroăng loi tĭng tiô khôp tơkŭm po Trâm mâ lâp tơnêi têa mâu ngế ki kơhnâ rơkê tung hriâm tâp ƀă pêi tiô troăng tơdjâk, hiâm mơno Hồ Chí Minh ƀă dó inâi ‘’Hồ Chí Minh – Tơdroăng pói vâ hơnăm 2021’’. Plâ tơdroăng cho mâu tơdroăng ki rơrêk tung hiâm mơno,  têm rơpiât ‘na Pôa, ‘na mâu ngế ki djâ troăng ahdrối tung tơdroăng rêh ối tiah hmâ rêm hâi tiô troăng tơdjâk hiâm mơno Hồ Chí Minh. Teăng mâ khu râ kăn pơkuâ Đảng, Tơnêi têa, pôa Vương Đình Huệ rơkâu ƀă kheăn kơdeăn khu pú hên, ngế krê ki má môi tung lâp tơnêi têa ƀă kuăn pơlê pin ki rêh ối a kong têa ê.

Pôa Vương Đình Huệ, Kăn xiâm hnê ngăn Kuô̆k hô̆i veăng Tơdroăng ‘’Hồ Chí Minh – Tơdroăng pói vâ hơnăm 2021’’

Tung tơdroăng pêi pro Pơkâ kơxô̆ 05 ‘na ‘’Thăm hriâm tâp ƀă pêi tiô tơdjâk, hiâm mơno Hồ Chí Minh’’ hiăng ƀă dế hlo rế hía rế hên ngế ki kơhnâ rơkê, ai tơdjâk mơhnhôk kăn ƀô̆ đảng viên ƀă kuăn pơlê thăm hriâm tâp ƀă pêi tiô tơdjâ hiâm mơno Hồ Chí Minh. Pôa Vương Đình Huệ pói vâ Khu xiâm pơkuâ tơdroăng loi tĭng tiô khôp ƀă mâu kơ koan, tíu cheăng pơtối rak ƀă mơnhông mơdêk tâ mê nếo mâu tơdroăng ki pơxúa trâu hơngế kố.

            A Sa Ly tơplôu ƀă tơbleăng