VOV4.Xơ Đăng - Pơtối mâu tơdroăng tung roh lăm pôu pêi cheăng kong têa Hàn Quốc, pôa Vương Đình Huệ, Kăn xiâm hnê ngăn Kuô̆k hô̆i hiăng veăng Tơpui tơno ƀă Mâu Grup pơkuâ ki kân dêi Hàn Quốc xua Kŏng ti Kim ƀă Chang tơkŭm po. Xông tơpui a roh tơpui tơno, pôa Vương Đình Huệ mơnhên, tơrŭm cheăng Việt Nam – Hàn Quốc dế ối tung hneăng mơnhông mơdêk lĕm tro má môi ƀă dế hbrâ leh tơbâ 30 hơnăm mơjiâng tơrŭm cheăng tơpui kâ hơnăm 2022.

Tung roh lăm pôu pêi cheăng roh kố, pôa Vương Đình Huệ tối ăm ‘nâi, hiăng châ hlo tơdroăng kĭ ƀă diâp 27 hlá mơ-éa mơnhên, mâu tơdroăng môi tuăn mơ’no liăn cheăng pơla mâu khu tê mơdró, kong pơlê péa tơnêi têa ƀă kơnâ vâ chê 10 rơtal dollars, tơkêa kô djâ tơdroăng rêh ối ăm tơdroăng mơ’no liăn pêi cheăng, tê mơdró pơla péa tơnêi têa tung tơdroăng rêh ối nếo.

A roh tơpui tơno, teăng mâ mâu khu tê mơdró dêi Hàn Quốc hiăng pơkâ thăm tê phái ngi kong têa ê kum Việt Nam; vâ ti tăng plĕng ‘na troăng pêi ton xŏn dêi Việt Nam ƀă tơdroăng mơjiâng ô tô kơtâu ƀă on tơhrik; pơkâ Việt Nam pêi pro ƀă châ veăng tung mâu kơvâ mobile money, hngêi arak liăn xúa kơmăi kơmok; séa ngăn kơdroh xo hnoăng mơhá tiô luât; ai troăng hơlâ ăm mung liăn tung kơpong thôn pơlê, mơnhông mơdêk thôn pơlê, khu tơrŭm cheăng ƀă hía hé.

A Sa Ly tơplôu ƀă tơbleăng