VOV4.Xơ Đăng - Pôa Emmanuel Macron, Kăn xiâm pơkuâ kong têa Pơhlăng – kong têa pro kăn hnê ngăn Hô̆i đong châu Âu sap ing lơ 1 khế 1 hơnăm la ngiâ – tối ăm ‘nâi, Pơhlăng kô kơbông krếo châu Âu pơ’lêh troăng pêi tơtêk nếo klêi kơ’nâi pơreăng kân vâ kum châu Âu chiâng tơnêi tơníu krá tơniăn ó rơdêi tá ‘na mơjiâng pro kế tơmeăm khoăng, pơ’lêh nếo ƀă pêi cheăng.

Xông tơpui a ngiâ khu chêh hlá tơbeăng, Kăn xiâm pơkuâ kong têa Pơhlăng tối nhên: ‘’Tâng pin vâ teăm kong têa Mih ƀă kong têa Sinuâ, pin kal prôk ‘na peăng ngiâ hdrối’’. Kăn xiâm pơkuâ kong têa Pơhlăng xuân tối ăm ‘nâi, pôa kô xúa 6 khế Pơhlăng pro Kăn xiâm hnê ngăn Hô̆i đong châu Âu vâ tơkŭm môi hneăng hôp ki má môi dêi Khu tơrŭm châu Âu a khế 3 la ngiâ.

Akố, Pơhlăng kô kơbông krếo châu Âu kơjo tơpui tơno mâu troăng ‘mâi rơnêu pơkâ ‘na liăn ngân, kơdroh ‘na liăn ngân chu kơdroh vâ mơhnhôk mơ’no pêi cheăng klêi kơ’nâi tâi pơreăng kân ƀă thăm mơnhông tơtêk cheăng kâ.

Katarina Nga tơplôu ƀă tơbleăng