VOV4.Sêdang - Kơxê lơ 28/9, pôa Vũ Đức Đam, Ngế pro xiâm phŏ hnê ngăn tơnêi têa, Tôh pêi hnoăng cheăng dêi Chin phuh pêi pro hbrâ mơdât COVID-19 hôp ‘no tơdrêng ing troăng hyôh Internet ƀă 19 to kong pơlê peăng hdroh, ƀă mâu kong pơlê Tây Nguyên, Nam Trung Bộ ‘na tơdroăng ki pơtối tơrŭm krá tơniăn vâ hbrâ mơdât pơreăng.

A rôh hôp, teăng mâ Pơlê kong kân Hồ Chí Minh ƀă mâu kong pơlê Bình Dương, Đồng Nai, Long An rơhêng vâ tơdah kuăn pơlê a  mâu kong pơlê ki ê vêh dêi ngi kong pơlê pêi cheăng; tơdrêng hnối pơkâ thế mâu ngế pêi cheăng dế ối a kong pơlê pơtối ối a mê. Mâu kong pơlê kố tơhrâ rak tơniăn tơdroăng rêh ối pơlê pơla, pâk vaccine ăm vâi krâ nhŏng o ƀă rĕng ‘mâi mơnhông cheăng kâ, tăng cheăng pêi.

Pơkâ mơ’no xuân ối séa ngăn, klâ ăm ối krê mâu ngế ki vêh ing Pơlê kong kân Hồ Chí Minh, Long An, Bình Dương, Đồng Nai prếo ngi kong pơlê

Kăn pơkuâ mâu kong pơlê ki u ối tối nhên đi đo tơrŭm, krá tơniăn ƀă Pơlê kong kân Hồ Chí Minh, Bình Dương, Đồng Nai, Long An tung hbrâ mơdât pơreăng. Tiô kăn teăng mâ Khu xiâm ngăn pơkeăng ƀă khăm pơlât, maluâ Pơlê kong kân Hồ Chí Minh, Bình Dương, Đồng Nai, Long An ai kơxô̆ ngế pâk vaccine trum má 1 hên la mâu ngế ki hiăng tâ pâk xuân ối tâ pơreăng, tâ tú ăm ngế ki ê. Xua mê, tơdroăng ki prôk vêh dêi kuăn pơlê a Pơlê kong kân Hồ Chí Minh, Long An, Bình Dương, Đồng Nai vêh dêi ngi kong pơlê ki ê xuân athế séa ngăn, klâ ăm ối krê kơtăng tiô pơkâ.

Katarina Nga tơplôu ƀă tơbleăng