VOV4.Sêdang - Kơxê lơ 1/10, a rôh hôp tơbleăng dêi Khu hnê mơhno cheăng hbrâ mơdât pơreăng COVID-19 Pơlê kong kân Hồ Chí Minh, Kŏng an Pơlê kong kân ăm ‘nâi, hiăng ăm dâng 1.300 ngế kuăn pơlê châ vêh dêi ngi kong pơlê a kơxo lơ 1/10. Hlo tơdroăng ki kuăn pơlê djâ dêi rơpó tơkâ luâ a mâu tíu gak a mâu troăng Pơlê kong kân, khu kŏng an hiăng tơrŭm ƀă mâu khu râ, kơvâ cheăng tơbleăng tung loâ hnê tối, mơhnhôk kuăn pơlê vêh dêi ngi tíu ối ƀă pêi pro 5K rak tơniăn ‘na khăm pơlât.

Klêi kơ’nâi mơhnhôk, kuăn pơlê xuân rơhêng vâ châ vêh dêi ngi kong pơlê mê Kŏng an Pơlê kong kân hiăng tơrŭm ƀă Khu ngăn troăng prôk ƀă rơxế kơtâu, Khu ngăn pơkeăng ƀă khăm pơlât, Khu pơkuâ ngăn lêng pơlê kong kân vâ xing xoăng mâu khu ki vêh tiô rêm kơpong krê, xoăng phĭu tối tơbleăng dêi tơná. Drêng hiăng chêh tŭm tơdroăng dêi tơná ƀă tơpui tơno ƀă mâu khu râ kơvâ cheăng xing xoăng rơxế chơ, kŏng an pơlê kong kân djâ troăng ăm kuăn pơlê vêh cho kong pơlê tơdah xo. Tiô châ ‘nâi, tung rôh ai pơreăng kố nah, Pơlê kong kân Hồ Chí Minh hiăng tơrŭm ƀă mâu kong pơlê djâ lối 37 rơpâu ngế kuăn pơlê vêh dêi ngi kong pơlê.

Katarina Nga tơplôu ƀă tơbleăng