VOV4.Sêdang - Kơxo lơ 30/9, pôa Lê Hòa Bình, Kăn phŏ hnê ngăn Vi ƀan pơlê kong kân Hồ Chí Minh hiăng tơbleăng pơkâ ‘na pơtối mơdât, pơ’lêh mâu troăng hbrâ, mơdât pơreăng COVID-19 ƀă chôa ‘lâng vêh tơtêk, mơnhông mơdêk cheăng kâ – rêh ối pơlê pơla tung Pơlê kong kân Hồ Chí Minh. Tiô Pơkâ, kuăn pơlê drêng prôk lăm xúa mah QR dêi phân mêm VNEID ƀă phân mêm khăm pơlât Pơlê kong kân Hồ Chí Minh kô chiâng mơhno hâi khế pâk vaccine; tâng ôh tá ai mah QR, tơbleăng mơ-éa môi tiah: F0 hiăng prêi lĕm pơreăng pá kơdâm 180 hâi; Hiăng pâk ki vâ iâ 1 trum ƀă mâu pơkeăng vaccine pâk 2 trum ƀă iâ má môi 14 hâi klêi kơ’nâi pâk drêng châ kơ koan cheăng pơkâ.

Hôp thâ dêi Khu hnê mơhno hbrâ mơdât pơreăng COVID-19 a kơxo lơ 30/9

Pêi pro kơtăng 5K, drêng ai (kơ-o, tơngê, ôh tá kâi hiâm, ƀă ki ê hía) kal pơlât tơdrêng, tơpui tơdrêng ƀă kơxô̆ phôn ki ai mâ đi đo dêi Tôh ki pêi cheăng rĕng ‘na COVID-19 a pơlê kong kân lơ Tổng đài pơlât 115. Ki rơhêng vâ tối, kuăn pơlê ôh tá chiâng prôk lăm hmâng vâ xêh pơla mâu kong pơlê, pơlê kong kơdrâm ki ê; tâng kal khât vâ prôk lăm pơla kong pơlê thế pêi pro tiô pơkâ.

A Sa Ly tơplôu ƀă tơbleăng