VOV4.Sêdang - Kơxo lơ 8/9, a Hngêi Kuô̆k hô̆i, po Rôh hôp séa ngăn kơtăng, pêi pro tơdroăng cheăng dêi Đảng đoân Kuô̆k hô̆i pêi pro tơdroăng pơkâ Hneăng hôp kân mâu Kăn lâp tơnêi têa rôh má 13 dêi Đảng ƀă Tơdroăng ki pêi pro dêi Đảng ủy kơ koan Ƀơrô cheăng Kuô̆k hô̆i pêi pro tơdroăng pơkâ Hneăng hôp khu kăn lâp tơnêi têa rôh má 13 dêi Đảng.

Pơtối hơ’lêh nếo tơkŭm po ƀă pêi pro tơdroăng cheăng dêi Kuô̆k hô̆i

Pôa Trần Thanh Mẫn, Ngế cheăng tung Khu xiâm pơkuâ tơdroăng kal kí, kăn xiâm phŏ hnê ngăn Kuô̆k hô̆i veăng hôp a Rôh hôp. Tơpui a Rôh hôp, pôa Trần Thanh Mẫn pơkâ thế pơtối hơ’lêh nếo tơkŭm ƀă pêi pro tơdroăng cheăng dêi Kuô̆k hô̆i; hơ’lêh nếo túa pơkâ pêi cheăng mơdêk ki rơkê plĕng, tơƀrê tơdroăng cheăng, mơdêk tơniăn krê, mơdêk tơdroăng ki rơkê tung pêi pro mâu kơvâ cheăng luât, séa ngăn, pơkâ mâu tơdroăng ki kal dêi tơnêi têa.

Mâu tôh Đảng, rêm râ Đảng ối tung Đảng đoân, tơbleăng tơdroăng pêi pro hiăng mơjiâng ăm ti lâi tơtro ƀă hnoăng cheăng kal kí ƀă tơdroăng ki nhên dêi rêm tôh tơrŭm cheăng Đảng, kơ koan, tíu pêi cheăng ƀă khŏm mơ-eăm khât  ‘na tơdroăng kal kí, tơrŭm, rơkê, tơkâ luâ xơpá pêi klêi hnoăng cheăng ki châ pơcháu.

Katarina Nga tơplôu ƀă tơbleăng