VOV4.Sêdang - Tung roh ki ai pơreăng COVID-19 xông tâ tú hneăng má 4 kố nah, Dak Lak hiăng ai lối 1.300 ngế châi tamo xua tâ pơreăng COVID-19, cho kong pơlê ki ai kơxô̆ mơngế tâ pơreăng hên má môi a kơpong Tây Nguyên. Kơxô̆ mơngế tâ pơreăng tâk hên pro pá ăm khu ngăn pơkeăng ƀă khăm pơlât, rế hía rế hngăm ó ăm rêm ngế cheăng ‘na khăm pơlât, maluâ tiah mê, vâi xuân dế kum ‘no tâi dêi ivá cheăng, ivá rơkê dêi tơná vâ veăng hbrâ mơdât pơreăng. Hên ngế hiăng athế pơtê dêi tơdroăng cheăng krê vâ pêi klêi hnoăng cheăng tơplâ, mơdât pơreăng.

A kơpong klâ kơtăn Tíu xiâm hnê hriâm lêng kring tơniăn Hngêi trung Đại học Tây Nguyên, môi to kơ-ƀăng xối nếo mơjiâng pro vâ nâ Trần Thị Hương, kot mâ hơnăm 1983 cho ngế cheăng điều dưỡng pơlât mâu ngế châi tamo a Hngêi pơkeăng Y học cổ truyền Dak Lak dế pêi cheăng akố koh nhoăm dêi um pâ ki hiăng hlâ a hâi lơ 1/9. Têa mâ lo hên drêng nâ bú koh a um dêi pâ ing hơngế; Um ‘mé kiâ a pơlê Nam Định bú hlo ing krếo Zalo, phôn râng kŏng. Nâ Hương tơngah tiah kố, pơreăng COVID-19 rĕng kâi mơdât vâ nâ châ vêh dêi a pơlê xiâm chôu nhang a tơnâp dêi pâ:

“Rơnó pơtê hriâm kố nah xuân hiăng tơmiât vâ djâ vâi kuăn vêh pôu nôu pâ xua hơnăm nôu prế pâ á hiăng hên, la xua ing ai pơreăng ôh ta châ vêh, nôkố pâ á kơdrâ hlâ lêk lôi, tơdroăng hiăng tơmiât ôh tá châ pêi pro. Púi vâ rêm ngế rơtế veăng mơdât pơreăng vâ pin rĕng châ vêh a pơlê chôu nhang ăm dêi pâ’’.

Kơpong klâ kơtăn pú hên, nâ Trần thị Hương chôu nhang koh a um dêi pâ ki nếo hlâ

15 hơnăm pêi cheăng a Khoa xét nghiệm - Chẩn đoán hình ảnh - Thăm dò chức năng dêi Tíu xiâm Séa ngăn mơdât pơreăng kong pơlê Dak Lak, nâ Nguyễn Thị Kim Tuyền hiăng trâm hên túa pơreăng pro châi tung châ. La thế pêi cheăng tung Khu tí tăng ‘nâi kơxô̆ 3 tăng ngăn mâu ngế tâ pơreăng hbrâ, tơplâ mơdât pơreăng COVID-19, nâ nếo ‘nâi plĕng tâi mâu tơdroăng pá puât, xâu rơ-iô ƀă xo pêi tơdroăng cheăng ki hlâ rêh mê.

Nâ Tuyền ăm ‘nâi, lối 3 khế kố nah, drêng pơreăng COVID-19 a Dak Lak tâ tú rơ-iô, mơhé kơxo má lơ a kơxê măng, drêng tâng tối ulâi ai ngế tâ pơreăng khu vâi kô lăm troh amê khăm ngăn vâ tơdah xo ngế ki tâ pơreăng ăm lăm ôí krê. Mơhé thế pêi cheăng plâ hâi, plâ măng xâp plâ hâi măng ếo mêi chhá ki xi klêp, la ‘nâi nhên hnoăng cheăng khăm ngăn rah vâ ‘nâi ngế ki tâ pơreăng mê cho tơdroăng cheăng pơxúa pơkâ troh tơdroăng plâ mơdât pơreăng, mê mâu vâi nâ thế mơdoh tơrêm yâi, rêm phut vâ pêi rĕng klêi mâu tơdroăng cheăng.

Nâ Nguyễn thị Kim Tuyền dế khăm ngăn têa môh ăm mâu ngế ki F1 a tơring Krông Ana

Tơdroăng rêh ối tơná, hnoăng cheăng ngế kơdâi hiăng ai on veăng, hnoăng cheăng dêi ngế nôu chiâng lôi pá rŏng:

“Tơdroăng pêi cheăng ai drêng ‘nâ kơxo, ai drêng ‘nâ  kơxê, ‘nâ kơmăng dế. La lâi hiăng pê klêi mê nếo châ kâ, hên drêng ‘nâ 1-2 h kơxo nếo châ kâ kế, bú kâ pơtân tê. Troh kơxo ah nếo ôh tá châ pế pơchên ki klâi ôh, athế kâ môi pŭm ƀăn mi lơ ôu 1 kong kếo têa tê. Nôkố hiăng ai Zalo, a krếo, ngăn hlo um dêi kuăn tê ‘nâi pro ti lâi. Vâ kring vế ăm dêi kuăn ‘nĕng dêi kơnốu thế pro ti mê tê, xua tơdroăng cheăng nếo’’.

Sap hâi lơ 15/8, drêng Kơvâ pơlât pơreăng tâ tú dêi Hngêi pơkeăng Đa khoa kơpong Tây Nguyên châ pơ’lêh chiâng kơpong ki pơlât mâu ngế tâ pơreăng COVID-19 ki hiăng râ ó dêi kơpong Tây Nguyên, 21 ngế tá mâu ngế cheăng ngăn pơkeăng ƀă khăm pơlât, ƀok thái pơkeăng, điều dưỡng, hộ lý ƀă mâu ngế cheăng kih thuât viên hiăng thế pêi tơdrêng, pêi rĕng hên hdrôh vâ kum mâu ngế ki râ ó tơbriât ivá ki hiăng vâ hlâ rêh.

Mâu thái pơkeăng, ƀok thái pơkeăng a kơpong khăm pơlât COVID-19 ki râ dế mơ-eăm pơlât ngăn mâu ki râ ó hiăng ôh pa ngah rêh

Ƀok thái pơkeăng chuyên khoa II Trịnh Hồng Nhựt, Ngế pơkuâ Khoa hồi sức tích cực ki mơdât trếo ‘mêi, pơkuâ kơpong pơlât mâu ngế tâ COVID-19 ki hiăng râ ó a Hngêi pơkeăng Đa khoa kơpong Tây Nguyên ăm ‘nâi, mâu ngế ki chơ pơlât akố cho tung châ hiăng ai tơdroăng châi ki ê há ƀă tơlêi hlâ. Tơdroăng ki rêh ƀă hlâ hiăng achê dêi rơpó, mâu ƀok thái pơkeăng dêi kơpong pơlât mâu ngế tâ COVID-19 ki râ ó đi đo gak ngăn tơrêm yâi, rêm phut mơ-eăm pơlât tơplâ mơdât vâ khŏm kâi ƀlêi trâng ƀă pơreăng mê:

“Ngin tăng troăng tá tơdroăng khŏm châ kum erêh ƀă mâu ki hiăng ôh tá ai ivá, tá tơdroăng ki hriăn rơkê tung hnoăng cheăng pêi, tá tuăn hiâm ki lĕm tơdrăng khât dêi ƀok thái pơkeăng vâ tơbriât rêm yâi, rêm phut ƀă tơrêm chôu pơla tơdroăng ối rêh ƀă tơdroăng hlâ”.

Tơdroăng tơplâ mơdât pơreăng COVID-19 ối ton ƀă ối hên tơdroăng pá pơloăng mơnúa, la mâu lêng mâu ngế ki xiâm tíu tơplâ mơdât pơreăng a Dak Lak xuân kơdo mơ-eăm khât, khên tơnôu, hâi măng lăm tăng xiâm ki tâ pơreăng, rak ngăn pơlât, kring vế ivá mơngế ki dế pơlât ƀă kuăn pơlê. Vâi cho mâu ngế tơplâ khên tơnôu ki ôh tá tơpui rơbok, blĕm ki klâi ‘na tơdroăng tơplâ ki ôh tá xê ƀă pháu hnêa mê.

Nam Trang chêh

Gương tơplôu tơbleăng