VOV4.Xơ Đăng - Kơxo lơ 7/12, a Hngêi hôp Ngọc Linh, pơlê kong kơdrâm Kon Tum, Hô̆i đong hnê ngăn kong pơlê Kon Tum hneăng má 12 pơxiâm po hneăng hôp má 2. A hneăng hôp kố, Hô̆i đong hnê ngăn kong pơlê Kon Tum kô séa ngăn, tơpui tơno ƀă pơkâ hên tơdroăng ki kal ối tung hnoăng pơkuâ. Tối tơbleăng dêi Vi ƀan hnê ngăn kong pơlê Kon Tum a hneăng hôp ăm hlo, maluâ trâm hên ƀă tơdroăng ki xơpá, pơloăng mơnúa ƀă tơdjâk dêi pơreăng COVID-19, la hơnăm 2021 cheăng kâ rêh ối pơlê pơla kong pơlê Kon Tum xuân ối châ hên mâu tơdroăng pơkâ ki kal, môi tiah: Tâi tâng kế tơmeăm pơlê pơla tâk 6,47%; Tơdroăng pơkâ cheăng kâ hơ’lêh cheăng tro tiô pơkâ; Pêi lo liăn rêm ngế châ lối 47 rơtuh liăn; Nâp liăn tơnêi têa 3.500 rơtal liăn, châ tâi tâng mâu tơdroăng tơkêa kong pơlê pơcháu; Kong pơlê ai tơ’nôm 8 to cheăm pêi klêi thôn pơlê nếo; Kơxô̆ rơpŏng kơtiê kơdroh 4% tâng vâ pơchông ƀă hơnăm 2020; Hnoăng cheăng hbrâ mơdât pơreăng COVID-19 châ pêi pro kơtăng.

Tâ tá hneăng hôp má 2, Hô̆i đong hnê ngăn kong pơlê Kon Tum hneăng má 12

Tung 2 hâi tơdế po hneăng hôp má 2, Hô̆i đong hnê ngăn kong pơlê Kon Tum kô mơdoh hên chôu vâ mâu kăn tơpui leăng, pêi pro nhên xiâm kối mâu tơdroăng pơkâ hơnăm 2021 ôh tá pêi pro châ tiô pơkâ, môi tiah: kơxô̆ khu mơdró kâ mơjiâng nếo bu châ vâ chê 80%; ƀăng tơnêi pêt sâm Ngọc Linh ki nếo bu châ vâ chê 67% ƀă hên tơdroăng ki ê. Tơdrêng amê hnối tơkŭm tơpui tơbleăng mâu tơdroăng pơkâ, hnoăng cheăng ƀă mâu troăng hơlâ mơnhông mơdêk cheăng kâ rêh ối pơlê pơla, rak tơniăn pơlê pơla cheăm bêng gâk kring hơnăm 2022.

Katarina Nga tơplôu ƀă tơbleăng