VOV4.Sêdang - Kơxê lơ 6/10, Hneăng hôp Ngế xiâm ASEAN ‘na gak kring măng internet roh má 6 dó inâi AMCC – 6 xua Singapore tơkŭm po tiô troăng mơ’no tơdrêng tung um tiô troăng măng Internet hiăng pơxiâm po păng ‘nâng. Khu râ kăn Việt Nam xua Trung tươ̆ng Lương Tam Quang, Ngế xiâm phŏ pơkuâ Kŏng an veăng a tíu xiâm mơ’no um a Hà Nội.

Măng tĭng leh Gak kring tơniăn măng lâp plâi tơnêi roh má 6 dó inâi SICW-6 ƀă Hneăng hôp Ngế xiâm ASEAN ‘na gak kring tơniăn măng Internet roh má 6 dó inâi AMCC-6 cho tơdroăng ki kal tiah hmâ xua Singapore tơkŭm po vâ tơpui tơno túa ki rơkê tơtro, tơ’nôm mâu tơdroăng ‘na tơdroăng gak kring măng lâp plâi tơnêi ƀă tung ASEAN.

Tơdroăng dêi Măng tĭng leh gâk kring măng lâp plâi tơnêi hơnăm kố cho ‘’Rêh ối tơdjuôm ƀă COVID-19 – mơnhên mâu pơloăng mơnúa ƀă roh tơ’lêi hlâu ‘na gak kring kih thuât kơxô̆’’ vâ tơpui tơno ‘na tơdroăng tơrŭm pơla mâu kong têa, khu tê mơdró vâ xúa mâu roh tơ’lêi hlâu kih thuât kơxô̆ tá hâi chói ai ahdrối rơxông pơreăng xông tâ tú ƀă hbrâ ví ƀă mâu tơdroăng mơnhâu tung măng Internet rế hiá rế tâk tơniăn gak kring ƀă tơdroăng ki mơ-eăm xêh dêi tung măng internet.

A Sa Ly tơplôu ƀă tơbleăng