VOV4.Sêdang - Kơxo lơ 4/10, Hneăng hôp roh má 4 Khu xiâm pơkuâ Đảng hneăng má 13 hiăng pơxiâm po kân krip a Pơlê kong xiâm Hà Nội, pôa Nguyễn Phú Trọng, Kăn xiâm pơkuâ hnê ngăn Đảng pơkuâ ƀă ai xông tơpui pơxiâm po ki kal a hneăng hôp. Hneăng hôp roh kố kô tơpui tơno ‘na: Tơdroăng hbrâ, mơdât pơreăng COVID-19 ƀă troăng tơmiât pêi, troăng hơlâ ‘na hbrâ, mơdât pơreăng tung rơxông nếo; tơdroăng cheăng kâ – rêh ối pơlê pơla hơnăm 2021, tiô tối Pơkâ mơnhông cheăng kâ – rêh ối pơlê pơla hơnăm 2022; tơdroăng pêi pro rak liăn ngân tơnêi têa hơnăm 2021, tối hdrối mơ’no liăn ngân tơnêi têa hơnăm 2022 ƀă Pơkâ mơ’no liăn ngân tơnêi têa 3 hơnăm 2022 – 2024; Troăng hơlâ pro a hâi khế ki ê pêi pro pơ’lêh troăng hơlâ liăn khế tiô Pơkâ kơxô̆ 27-NQ/TW dêi Hneăng hôp Tơnêi têa 7 hneăng XII ƀă mâu tơdroăng kal ki ê.

Tối nhên, mâu tơdroăng xiâm tơbleăng Hneăng hôp Tơnêi têa roh kố cho mâu tơdroăng ki kal ƀă tơdroăng pêi pro ƀlêi trâng Pơkâ Hneăng hôp má XIII dêi Đảng, tá tơdroăng pêi pro hnoăng cheăng xiâm cho mơnhông mơdêk cheăng kâ – rêh ối pơlê pơla ƀă pêi pro hnoăng cheăng ki xiâm cho mơjiâng, pro ăm tơtro tung Đảng, pôa Nguyễn Phú Trọng, Kăn xiâm pơkuâ hnê ngăn Đảng môi xôh nếo pơkâ, Tơnêi têa mơnhông hiâm mơno pôu râng hnoăng cheăng, hriăn plĕng, tơpui tơno khât păng ‘nâng, veăng tơpui vâ pêi kêi đeăng mâu tơbleăng, tơdroăng tơkêa bro, mơ-éa tơkêa bro mâu pơkâ, mơgêi dêi Tơnêi têa ƀă séa ngăn, pơkâ a mơ’nui hneăng hôp. Hneăng hôp tiô tối hdrối pêi cheăng troh hâi lơ 7/10.

            A Sa Ly tơplôu ƀă tơbleăng