Hơnăm kố o Nguyễn Ngọc Minh Tâm ối a pơlê Brang, cheăm tơkăng kong Ia Púch, to lâm 7. Kố cho rôh apoăng o hơhngế rơpŏng, kâ koi ối pơtê tung hngêi trung ƀă mơ’nui măng tĭng nếo vêh a hngêi. Hơnăm hriâm nếo, mot a hngêi trung hriâm ki nếo, ai tơdroăng hriâm tâp, pơtâp, xah hêi pro o Tâm hâk ro.

‘’Á hâk ‘nâng mot hơnăm hriâm nếo xua á muăn kô châ hriâm hên tơdroăng, hên môn hriâm ƀă ai tơ’nôm hên chô vâ hriâm ƀai. Ai drêng ‘nâ á  ôh tá plĕng ƀai, á muăn kô chiâng kơ-êng tơdrêng thái cô mê ôh tá kal tơkôm troh a hâi kơ’nâi ôh. Pakĭng chô hriâm tâp, ngin muăn kô châ ‘nâi hên tơdroăng, lăm a tíu chô kơxôp mơ-éa vâ pơchuât lơ kơxế lăm xah hêi peăng xâk í, xah tah xâk í. Mê cho chô phut ki sôk ro’’.

Rơtế ƀă tơdroăng ki hâk vâ dêi hok tro cho tơdroăng ki sôk ro, tơdroăng ki hmiên tuăn ƀă kơdroh ki hngăm ăm nôu pâ drêng vâi hdrêng châ hriâm tâp ƀă châ hriâm tâp kâ koi ối pơtê a hngêi trung.

Hơnăm hriâm kố, tŭm péa ngế kuăn dêi pôa Rơ Mah Ca, hdroâng kuăn ngo Jarai, ối a pơlê Chư Kó, cheăm Ia Púch, pơrá mot hriâm a hngêi trung ai tíu kâ koi ối pơtê tung hngêi trung. On veăng pôa cho kŏng nhân kúa chhá kơxu, hmâ athế lo ing hngêi pêi cheăng sap ing kơxo má, klêi mê, vêh a hngêi vâ teăm djâ chiên dêi kuăn troh a hngêi trung. Mot tung rơnó pêi chiâk deăng lơ mâu hâi kong mêi kân, troăng prôk pá puât, ôh tá teăm djâ, pôa athế lôi dêi kuăn pơtê hriâm a hngêi.

Nôkố, drêng mâu kuăn châ kâ ối, hriâm tâp ƀă ối tung hngêi trung sap apoăng măng tĭng troh mơ’nui măng tĭng. On veăng pôa Rơ Mah Ca ôh tá tô tuăn tơdroăng chiên kuăn rêm hâi, ƀă mâu kuăn xuân kơdroh tơdroăng pơtê hriâm xua mâu tơdroăng ki pá puât ing rơpŏng ƀă troăng prôk lăm hơhngế lơ ‘mêi ‘mâk.

‘’ Mơnê Đảng ƀă Tơnêi têa hiăng mơjiâng hngêi trung ai tíu kâ koi ối pơtê lĕm. Sap ing kố, mâu kuăn á châ hriâm tâp, kâ ôu, pơtê, xah hêi tung hngêi trung, troh mơ'nui măng tĭng nếo vêh a hngêi. Á phiu ro 'nâng‘’.

Hngêi trung phôh thông ai tíu kâ koi ối pơtê tơdjêp râ má môi ƀă râ má péa Ia Púch hơnăm kố ai 752 ngế hok tro, châ xing xoăng chiâng 23 to lâm. Vâ mâu nôu pâ hlê plĕng ƀă môi tuăn ƀă túa hriâm nếo, sap ing mơ'nui hơnăm hriâm 2025-2026, cheăm Ia Púch tơrŭm ƀă mâu hngêi trung râ má môi, râ má péa tung cheăm mơjiâng túa pơkâ mơjiâng hngêi trung phôh thong ai tíu kâ koi ối pơtê tơdjêp râ má môi ƀă râ má péa. Tung mâu khế pơtê hriâm, tơdroăng rah xo hok tro, xing xoăng thái cô, xing xoăng lâm hriâm, kơpong kâ koi ối pơtê ƀă mâu tơdroăng hnê hriâm châ  pêi pro tơdrêng.

Thái Trương Duy Hồng, thái hnê a hngêi trung ăm 'nâi ,tơdroăng hnê hriâm a hngêi trung ai tíu kâ koi ối pơtê xuân pơkâ thế thái cô hnê hơ'lêh túa tơkŭm po ƀă pơkuâ hok tro. Thái pơkuâ lâm hiăng mơjiâng khu Zalo, hôp ƀă tơpui tơno tơdrêng ƀă tơrêm rơpŏng hngêi vâ nôu pâ 'nâi nhên tơdroăng hriâm tâp, kâ koi, rêh ối dêi kuăn.

‘’ Mâu thái cô pơkuâ lâm hiăng hôp ƀă mâu nôu pâ hok tro, pơtroh chư chêh ăm mâu nôu pâ tơpui tơno 'na túa pêi cheăng dêi hngêi trung ƀă hngêi trung ai tíu kâ koi ối pơtê. Ki hên mâu nôu pâ hok tro hmiân tuăn khât. Xua vâi hlê túa hngêi trung nếo kân rơdâ, tŭm tơdroăng, tíu xah hêi, kâ koi, ối pơtê, tơniăn lĕm khât‘’

Rơtế ƀă Hngêi trung phôh thong ai tíu kâ koi ối pơtê tơdjêp râ má môi ƀă râ má péa Ia Púch, hơnăm hriâm 2026-2027, kơpong peăng mâ hâi Luô kong pơlê Gia Lai ối ai 6 to hngêi trung rơtế túa pơkâ pêi cheăng, tơdah hok tro a mâu cheăm tơkăng kong. Mâu tơmeăm châ pơxiâm pro sap ing khế 11/2025, troh nôkố hiăng vâ pro klêi mâu tơmeăm ki kal xúa tung hnê hriâm, kâ ối ƀă rêh ối. Tâi tâng 7 to hngêi trung hiăng rah xo lối 6.800 ngế hok tro, ki hên hriâm kâ ối pơtê tung hngêi trung ƀă hriâm kâ koi pơtê kơhâi dế a hngêi trung.

Kố cho tơdroăng ki hơ'lêh hôm khât ƀă kơpong tơkăng kong peăng mâ hâi Lu Gia Lai, tíu ai dâng 90 km troăng tơkăng kong, kơdrâm kuăn pơlê hdroâng kuăn ngo rêh ối ƀă tơdroăng prôk lăm, hriâm tâp dêi vâi hdrêng ối pá puât. Ƀă túa pơkâ ki nếo, hok tro ôh tá xê to ai tơ'nôm kơbong hriâm, kơpong kâ koi ối pơtê mê ối ai tíu vâ pơchuât hlá mơ-éa, xah hêi ƀă veăng mâu tơdroăng hnê hriâm pakĭng chôu hriâm. Ki kal tâ, tơdroăng hriâm dêi mâu vâi o châ rak vế tơniăn, teăng tơdroăng ki kơnôm hên ing tơdroăng ki pơto chơ chiên ƀă tơdroăng rêh ối dêi rêm rơpŏng hngêi.

Pôa Phạm Văn Nam, Kăn pơkuâ Khu pơkuâ hnê hriâm ƀă hnê mơjiâng tuăn ngôa rơkê kong pơlê Gia Lai ăm 'nâi, mâu hngêi trung ki ai tíu kâ koi ối pơtê tơdjêp râ kô veăng kum kơdroh ki kơtăn hơngế tung hnê hriâm pơla kơpong tơkăng kong ƀă mâu kơpong ki tơ'lêi hlâu tâ, tơdrêng amê hlối mơjiâng mơngế pêi cheăng a kong pơlê.

‘’Hngêi trung phôh thong ai tíu kâ koi ối pơtê tơdjêp râ a mâu cheăm tơkăng kong ai pơxúa kal khât. Vâi o kô châ rak ngăn, păn roăng krâu, kơhnâ vâ ai tơdroăng hriâm tâp lĕm tro tâ, veăng kum hơ'lêh tuăn tơmiât. Xua mâu hngêi trung kố kô hnê mơjiâng mâu ngế ki rơkê vâ xo ah hmôi vâi vêh pêi cheăng a pơlê xiâm dêi tơná, veăng kum mơnhông cheăng kâ - rêh ối pơlê pơla a kong pơlê.’’

Sap ing rơnó pơxiâm mot hriâm kố, hok tro kơpong tơkăng kong peăng mâ hâi Luô kong pơlê Gia Lai pơxiâm châ hriâm tâp, kâ ối ƀă pơtâp tung môi tíu hnê hriâm tơdâng tơ'mô. Hngêi trung hriâm nếo ôh tá xê to 'mâi hơ'lêh tơdroăng hriâm tâp hâi kố, mê ối cho tíu tŏng kum, mơdêk tơdroăng la ngiâ ăm vâi hdrêng kơpong tơkăng kong a cheăm./.