Hơnăm hriâm nếo 2026 – 2027, Hngêi trung phôh thong ai tíu kâ koi ối pơtê Râ má môi ƀă râ má péa Ia R’vê ai 34 to lâm ƀă 880 ngế hok tro, tung mê 216 ngế o kâ koi ối pơtê a hngêi trung. Pôa Hồ Sĩ Cát, pơkuâ hngêi trung ăm ‘nâi, rơtế ƀă tơdroăng hbrâ rơnáu tŭm mâu tơdroăng xúa tung hnê ƀă hriâm, hngêi trung ối tơtrŏng troh cheăng hbrâ mơdât pơreăng ăm hok.

“Ngin tơrŭm ƀă Hngêi pơkeăng cheăm Ia Rvê, Hngêi pơkeăng Khu ngăn tơdroăng cheăng kâ - gâk kring 737 tơkŭm po xôh pơkeăng, kơdê kiâ ngu ngĕng, tri trôu a tíu tâ tá lâm hriâm, kơpong hngêi ối, hngêi kâ hmê, hngêi ối pơtê. Mơhnhôk hok tro rak vế krúa lĕm tíu ối hngêi ối pơtê. Tơdrêng amê, pơkâ thế ƀơrô ngăn pơkeăng hngêi trung hbrâ tŭm pơkeăng vâ hbrâ mơdât tơdroăng hok tro trâm xía vâ”.

O Đậu Anh Thư, 10 hơnăm, ối a cheăm Ia Rvê rôh apoăng hơngế ing rơpŏng hngêi hriâm tâp ƀă rêh ối a hngêi trung. Klêi kơ'nâi môi măng tĭng hmâ ƀă tơdroăng ki nếo, Anh Thư hiăng chôa 'lâng hmâ ƀă tơdroăng rêh ối:

“Hrối vâ kâ mê o athế xếo kŏng, pêi pro kâ tô, ôu chên. Drêng xah hêi mê ôh tá xah hêi a mâu tíu ki hngiâm kơchoh, ai hên tri trôu xua gá kô pâk vâi o, mê athế hbrâ mơdât. Ngin o xuân xing xoăng hâi khế vâ pơkuâ ngăn hngêi trung. Drêng koi mê kât kơmung vâ ví tro tri trôu pâk".

Lâp kong pơlê Dak Lak nôkố ai 650.000 ngế hok tro hriâm a 625 tíu hnê hriâm. Pôa Lưu Tiến Quang, Phŏ pơkuâ ngăn Hnê hriâm ƀă hnê mơjiâng tuăn ngôa rơkê kong pơlê Dak Lak, ăm 'nâi, tơdroăng hbrâ, mơdât pơreăng sap ing hngêi trung châ Khu xiâm mơnhên cho hnoăng cheăng ki kal.

“Kơvâ ngăn hnê hriâm hiăng hnê mơhno mâu tíu hnê hriâm, hngêi trung, malối a kơpong hơngế hơngo, kơhnâ tơkŭm po mơgrúa lĕm kong prâi tơnêi tíu, hngêi trung hriâm vâ hbrâ mơdât pơreăng tơngê lo mơheăm. Pakĭng mê, ƀă mâu pơreăng tâ tú ki ê tiô rơnó, pơkâ thế khu ngăn pơkeăng hngêi trung hriâm athế séa ngăn nhên vâ kơdroh iâ má môi tơdroăng ki pơreăng xông tâ tú a hngêi trung hriâm”.

Ƀok thái pơkeăng Hoàng Hải Phúc, Kăn pơkuâ Tíu xiâm séa ngăn mơdât pơreăng kong pơlê Dak Lak, ăm 'nâi hơnăm hriâm nếo xuân cho rôh kong mê hngê, pro mâu pơreăng tâ tú môi tiah tơngê lo mơheăm, thĕn kŏng chêng rơkong, lo kơtuâ ‘mêi ƀă hên mâu pơreăng ki ê. Kơvâ ngăn pơkeăng ƀă khăm pơlât tơrŭm ƀă kơvâ ngăn hnê hriâm dế tơbleăng mâu troăng hơlâ hbrâ mơdât pơreăng:

“Mâu kong pơlê tơbleăng mâu tơdroăng mơgrúa kong prâi, mơgrúa hngêi trăng vâ hbrâ mơdât mâu pơreăng tơngê lo mơheăm, thĕn kŏng chêng rơkong, tơhĕn lo kơtúa ‘mêi; tơdrêng amê mơdêk pâk tơ'nôm, pâk tâi ăm mâu vâi hdrêng ki tá hâi châ pâk tŭm. A mâu hngêi trung hriâm ƀă mâu pơlê cheăm ki tơ'lêi tâ tú, ngin pơtroh kăn ƀô̆ lăm séa ngăn, mơnhên tối kơxô̆ véc-tơ, kơxô̆ tri trôu ƀă tâng hlo tơ'lêi tâ tú mê ăm rơxế ô tô chơ kơmăi xôh pơkeăng kơdê tri trôu, kơdê kiâ ngu ngĕng, tri trôu tung lâp lu”.