Rôh hôp tơkŭm mâu khu râ kăn xiâm, ngế pơkuâ kong têa, kăn pơkuâ mâu kơ koan hyôh kong prâi tơnêi têa, mâu khu tơrŭm cheăng lâp plâi tơnêi, mâu khu mơdró kâ, khu ki hriăn plĕng 'na hyôh kong prâi ing dâng 130 to kong têa tung lâp plâi tơnêi; ƀă tơdjêp tơdrêng ƀă Tíu pêi cheăng ‘na rơvâ plêng lâp plâi tơnêi ISS. Hneăng hôp ai hên tơdroăng tơpui tơno troăng hơlâ, tơbleăng roh tơ'lêi tơrŭm cheăng lâp plâi tơnêi 'na kŏng ngê̆, tê mơdró, hriăn plĕng - hnê hriâm 'na tơƀai kơneăng, tung mâu troăng hơlâ tơrŭm cheăng lâp plâi tơnêi mơdêk cheăng kâ tơƀai kơneăng, rak tơniăn tơƀai kơneăng a rơvâ plêng ing tơpui tơno ƀă tơrŭm cheăng, mơdêk khoa hok kŏng ngê̆ hriăn plĕng tơƀai kơneăng xua la ngiâ kuăn mơngế.

Tơpui pơxiâm po Rôh hôp tơpui tơno, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối 5 tơdroăng pơkâ pơkuâ hên troăng ƀă ngăn xúa ‘na rơvâ plêng, krếo thế ôh tá pơloăng mơnúa lơ xúa ivá, 'măn kuăn mơngế ƀă Plâi tơnêi a tíu xiâm. Pôa pơkâ thế troăng tơmiât pêi rơkê tiô mê Việt Nam rơtế ƀă Pơhlăng, Khu lâp kong têa, ASEAN ƀă mâu khu tơrŭm cheăng hriăn plĕng mơjiâng tơdroăng “Kơpong kong prâi xua mơnhông ƀă Tơdroăng ki kâi trâng", tơkŭm tung tơdroăng tối ăm dêi rơpó ƀă xúa mâu tơdroăng chêh 'măn tung kơmăi xua mơnhông, mơdêk ivá rak tơniăn kơpong tơniăn, krá tơniăn ƀă tơdjêp hriăn plĕng - hnê hriâm - khu tê mơdró - mơ'no liăn cheăng vâ mơnhông cheăng kâ tung hbo plêng. Tơdroăng tơkêa bro ki hdrối tơkŭm a kơpong Đông Nam Á ki Việt Nam hbrâ cho tíu tơdjêp.