Péa ngế kăn xiâm pơkuâ tối phiu ro hlo tơdroăng mơnhông trâu hơngế, tŭm têk ƀă păng 'nâng tơrŭm cheăng Việt Nam - Mông Cổ, malối sap ing péa tơnêi têa mơjiâng tơrŭm cheăng tung tŭm tơdroăng drêng rôh lăm pôu râ Tơnêi têa troh Mông Cổ dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa a khế 9/2024.

Péa pâ môi tuăn pơtối loi tơngah kal kí, rak đi đo trâm mâ khu râ kăn xiâm ƀă mâu râ ƀă hên troăng pêi ƀeăn ƀĕng; pơtối thăm po rơdâ tơrŭm cheăng tơpui kâ, gâk kring tơnêi têa, kring tơniăn; mơdêk tơrŭm cheăng păng ‘nâng, rơtế ai pơxúa, ing mê, pro pơhlêh tung mơnhông ‘na tơrŭm cheăng kâ, tê mơdró ƀă mơ’no liăn cheăng, tung mê ai tơdroăng mơdêk pêi pro rĕng tơkŭm po Hneăng hôp rôh má 20 dêi Vi ƀan tơdjêp Chin phuh Việt Nam – Mông Cổ; mơ-eăm châ pêi lo liăn tê mơdró pơla péa pâ tâk châ 200 rơtuh dollars; mơdêk tơrŭm cheăng khoa hok kŏng ngê̆, ôm hyô, pơ'lêh kơxô̆, on tơhrik ki vêh pro, on tơhrik krúa lĕm.

Ngế pro xiâm hnê ngăn kong têa Mông Cổ pơkâ thế tơdroăng hriăn plĕng, mơdêk tơpui tơno troăng rơxế kơtâu pơla pái pâ Việt Nam - Mông Cổ - Sinuâ vâ mơdêk châ tơƀrê, păng 'nâng tơrŭm cheăng tung kơvâ rơxế prôk lăm ƀă logistics.