Ƀă rơtăm mơngế Jarai rơkê hên tơdroăng Rơ Châm Blinh, ối a cheăm Ia Phí, kong pơlê Gia Lai, tơmiât pêi rơkê hiăng chiâng môi tơdroăng dêi tơdroăng rêh ối. Mơgêi râ má pái kơvâ kơchuâ um, laga ngoh pơtối pêi cheăng tung kơvâ tơdrá prôk ƀă mâu tơdroăng rơhdruê péa nâl Jarai – Xuăn djâ tơdrá Tây Nguyên, troh lâp lu rơdêi tung măng pơlê pơla.

Ai rơkong hơdruê prông lĕm, rơdêi ƀă tơdroăng ki mơđah tơbleăng hơdruê rơkê, mâu video "rơtuh View" dêi Rơ Châm Blinh djâ troh ăm mơngế tơmâng hên tơdroăng ki nếo. Ing tơdroăng hơdruê, ngoh pói vâ rak vế, mơnhông khôi túa lĕm tro dêi hdroâng kuăn ngo tơná. Hâk vâ ƀă veăng tơ’noăng mơhnhôk hơnăm ôm hyô tơnêi têa Gia Lai 2026, ngoh châ kâ pri má môi Rôh tơ'noăng video ôm hyô Gia Lai 2026 ƀă dó inâi "Rêm ngế kuăn pơlê Gia Lai cho môi ngế kăn teăng mâ ôm hyô". A Hneăng hôp KOL kong pơlê Gia Lai 2026, tơkŭm po kơxo lơ 11/9, Rơ Châm Blinh tối:

“Á hâk tơngăm khât drêng châ Kŏng an kong pơlê Gia Lai krếo thế veăng hôp a Hneăng hôp KOL Gia Lai 2026. Akố, á ai rôh trâm mâ ƀă tơpui tơno ƀă hên mâu vâi pú ki rơkê chêh bro tơdroăng nếo ing Quy Nhơn xuân môi tiah mâu kong pơlê ki ê. Kố cho rôh ki lĕm tro vâ khu ki rơkê chêh bro tơdroăng nếo rơtế hriâm ƀối, tơdjêp ƀă mơđah tơbleăng um méa pơlê xiâm. Tơná á đi đo rơhêng vâ mâu khu ki rơkê chêh bro tơdroăng nếo kô kơhnâ tơbleăng hên tâ nếo 'na túa lĕm tro, khôi túa, vêa vong ƀă mâu leh mơdĭng ki lĕm tro dêi kơpong tơnêi kố."

Xuân ƀă mâu video ki tiah hmâ, nâ Rah Lan H'Wĩ, ối a thôn Kte Lớn A, cheăm Phú Thiện, kong pơlê Gia Lai, dế veăng kum tơbleăng um méa khôi túa lĕm tro Jarai tung măng pơlê pơla. Klêi hriâm Hngêi trung Đại học Thể dục Thể thao Đà Nẵng, H'Wĩ ai tơdroăng ki rơkê tê mơdró online tung TikTok ƀă Facebook. Mâu video 'na khôi túa lĕm tro châ nâ pêi pro a pơlê ƀă tung rơpŏng hngêi hiăng tơ'mot hrĭng rơtuh ngế ngăn.

Ing mơdĭng xối pleăng mâ, mơdĭng hlŭm trŭm tuăn, mơdĭng krếo mơhúa troh mâu kơchâi kâ ki hmâ môi tiah mŏn xào, ká kâm tung hlá priât, pêi trŏng xăng ƀă hiá hé, H’ Wĩ djâ khôi túa lĕm tro Jarai troh ƀă mơngế ki ngăn ƀă mâu um ki achê. Nếo achê kố, video xup thâu tơdroăng ngế nôu pế drô xiâm Jarai tiô khôi vâi krâ nah pơtối châ hên ngế rơhêng vâ tơmâng dêi pơlê pơla. Ƀă H’Wĩ, tơmiât pêi pro rơkê tơdroăng xiâm rế cho troăng tăng cheăng pêi, rế cho troăng ki vâ troh lâp lup khôi túa lĕm tro pơlê xiâm.

“Á pro tơdroăng xiâm tơbkeăng tung TikTok, ki xiâm tối 'na tơdroăng tăng liăn vâ mơjiâng môi toăng hngêi ăm nôu pâ. Mâu tơdroăng mê châ tơdroăng ki tơmâng ngăn, séa ngăn ƀă tŏng kum dêi hên ngế. Châ veăng hôp a Hneăng hôp KOL kong pơlê Gia Lai cho môi tơdroăng ki sôk ro ƀă xuân cho tơdroăng ki mơhnhôk kân khât ƀă á. Tung tơdroăng ki pro tơdroăng, á đi đo mơnê mâu ngế ki hiăng hâk vâ, tŏng kum ƀă rơtế prôk ƀă á. Kơnôm ing tơdroăng ki tơmâng ngăn dêi rêm ngế mê á nếo ai hâi kố. Ing hneăng hôp roh kố, á xuân rơhêng vâ veăng kum môi iâ hnoăng cheăng dêi tơná vâ tơbleăng, mơđah tơbleăng mâu um méa dêi kong pơlê".

Ôh tá xê to mâu ngế hơnăm ối nếo pro tơdroăng ‘na khôi túa lĕm tro, tơdroăng rêh ối, khu Kŏng an xuân dế xúa măng pơlê pơla vâ djâ um méa ki achê, pơxúa khât troh ƀă kuăn pơlê. Thiê̆u tă Lại Văn Đạt, kăn ƀô̆ Tôh Gâk kring, Kŏng an cheăm Phú Thiện, cho môi tung mâu KOL dêi kong pơlê Gia Lai châ pơlê pơla ‘nâi troh ƀă troăng pêi ‘’Kŏng an vêh pơlê’’.

Tung pơla pêi cheăng, trâm mâ ƀă kuăn pơlê, ngoh hriâm xêh nâl Jarai vâ pơtâng tối luât ƀă nâl kuăn ngo; tơdrêng amê mơhnhôk diâp 500 to kơtong ăm hok tro ki xơpá drêng mot hơnăm hriâm nếo. Mâu um méa ing tíu pêi cheăng a pơlê pơla châ Thiê̆u tă Lại Văn Đạt chêh xo, xup xo, tơbleăng tung măng pơlê pơla ƀă tơdroăng ki ai khât, tơ'mot rơpâu ngế ngăn. Tiô ngoh, tơdroăng hriâm xêh nâl Jarai, hlê khôi túa dêi kuăn pơlê kum tơdroăng pơtâng tối, mơhnhôk achê kuăn pơlê ƀă tơƀrê tâ.

“Drêng á hriâm xêh ƀă 'nâi tơpui nâl hdroâng kuăn ngo cho Jarai mê tung tơdroăng cheăng hlo tơ'lêi hlâu, achê tâ mê hlê plĕng tơdroăng púi vâ dêi vâi krâ kuăn pơlê. Ing mê, ngin ai troăng hơlâ pêi cheăng, pơtâng tối mơhnhôk trâu hơngế ƀă tơdroăng ki ai khât, mê châ kuăn pơlê hâk vâ môi tuăn tung pơla ngin pơtâng tối ƀă nâl Jarai xuân môi tiah kum kuăn pơlê.’’

Hneăng hôp KOL kong pơlê Gia Lai hơnăm 2026, ƀă dó inâi "Kong ngo kân rơdâ tơdjêp têa kơxĭ ngiât - Troh lâp lu tơdroăng loi tơngah xúa kŏng ngê̆ kơxô̆", châ tơkŭm po tung tơdroăng hơnăm Ôm hyô tơnêi têa 2026, vâ tơdjêp pơlê pơla, tối ăm dêi rơpó túa ki rơkê tơtro ƀă rơtế tơbleăng khôi túa lĕm tro, ôm hyô, kuăn mơngế Gia Lai. Mê cho rôh trâm mâ dêi mâu tơdroăng víu ngăn, mâu tơdroăng hơ'muăn ƀă mâu kuăn mơngế dế rêm hâi xúa tơdroăng ki pro tơdjâk dêi tơná vâ tơbleăng tơdroăng  nếo ai ti lâi mơhno ti mê. Ing mê, mơjiâng môi tơdroăng xúa kŏng ngê̆ kơxô̆ tơniăn, rơkê ƀă loi tơngah khât.