Klêi kơ’nâi Leh tơdah, a Cung Nhà nước, pôa Trần Thanh Mẫn, Kăn xiâm hnê ngăn Kuô̆k hô̆i hiăng kĭ a kơtâ mơ-éa Tơmối ki kơnía. Kăn xiâm hnê ngăn Kuô̆k hô̆i tối nhên, tơrŭm cheăng tiô khôi vâi krâ nah Việt Nam - Mông Cổ xua Pôa Hồ Chí Minh, Kăn xiâm hnê ngăn tơnêi têa ƀă mâu rơxông kăn pơkuâ péa tơnêi têa hiăng mơ’no hên ivá mơjiâng ƀă tơbêng hiăng tơkâ luâ lối 70 hơnăm mơnhông mơdêk lĕm.

Ki rơhêng vâ tối, tơdroăng péa tơnêi têa mơjiâng tơrŭm cheăng ton xŏn Tâi tâng hiăng po hneăng tơrŭm nếo păng ‘nâng, châ tơƀrê ƀă tâi tâng tung rêm kơvâ cheăng. Kăn xiâm hnê ngăn Kuô̆k hô̆i mơnhên, Kuô̆k hô̆i Việt Nam đi đo nhuô̆m ƀă hbrâ rơtế Kuô̆k hô̆i Mông Cổ thăm tơpui tơno khu râ kăn, tơrŭm pơla mâu Vi ƀan cheăng, Khu kăn Kuô̆k hô̆i râ má môi nhŏng o ƀă mâu kăn Kuô̆k hô̆i hơnăm ối nếo; gum pro thăm loi tơngah kal kí, mơdêk tơrŭm cheăng kâ - tê mơdró, mơ’no liăn cheăng, khôi túa lĕm tro, hnê hriâm ƀă trâm mâ kuăn pơlê xua pơxúa dêi kuăn pơlê péa tơnêi têa, xua hơniâp lĕm, tơniăn ƀă mơnhông a kơpong ƀă lâp plâi tơnêi.