VOV4.Sêdang -  Sap mơ’nui khế 8 troh nôkố, kong pơlê Dak Nông hiăng ăm hok tro lăm hriâm a lâm, a hngêi trung. Tơrŭm krá tơniăn ƀă mâu khu cheăng tung tơdroăng hbrâ mơdât pơreăng COVID-19, kơvâ hnê hriâm hiăng ƀeăn ƀĕng mâu troăng hnê hriâm ki tơtro. Khu pơkuâ hnê hriâm ƀă hnê mơjiâng tuăn ngôa rơkê kong pơlê Dak Nông tối ăm ‘nâi, sap mơ’nui khế 8/2021, tiô tơdroăng pơreăng xông tâ tú a rêm pơlê mê kong pơlê pêi pro rơkê ƀeăn ƀĕng mâu troăng hriâm tâp tơniăn.

Hok tro a Hngêi trung râ má péa Dak Man, Krông Nô khăm ngăn ki tô tung châ ing kơmăi ki chiâng khăm xêh

Mê cho tơrŭm tơdroăng hriâm tung lâm, xing xoăng hok tro troh hngêi trung hriâm klâ kơtăn tơdế - tơdế, lơ hriâm tiô hâi môi – hâi pái – hâi pơtăm, hâi péa – hâi pŭn – hâi tơdrốu tung măng tĭng. Bu mâu kơpong dế thế klâ kơtăn, klâ kơtăn kơtăn ki nếo thế hriâm mơ’no tơdrêng tung um tiô troăng măng internet.

Drêng tơkŭm po hriâm mơ’no tơdrêng tung um tiô troăng măng internet, Dak Nông hiăng khăm ngăn a mâu hngêi trung ai hok tro troh ing hên kơpong. Kơnôm troăng pêi kố Hâi pơxiâm po hriâm hơnăm nếo lơ 5/9, kong pơlê hiăng châ hlo hok tro tro tâ COVID-19, ƀă ti tăng mâu ngế tro tâ tung pơlê pơla vâ mơdât.

Nôkố, vâ ‘’kâi trâng tơniăn, ƀeăn ƀĕng, mơdât pơreăng COVID-19 châ tơƀrê’’, Dak Nông thăm rĕng pêi tơdroăng pâk vaccine, thăm pơtâng tối mơdêk hlê plĕng dêi tâi tâng kuăn pơlê tung hbrâ mơdât pơreăng.

A Sa Ly tơplôu ƀă tơbleăng