VOV4.Xơ Đăng - Kŏng ti on tơhrik Dak Lak nôkố dế rak ngăn on tơhrik ƀă túa pơkâ 13 trăm 110kV, 5 tram trung áp 35kV ƀă 22kV, lối 6 rơpâu trạm biến áp phŭ taih, lối 5 rơpâu km troăng kơxái, kum mơ’no on tơhrik ăm 570 rơpâu ngế kuăn pơlê. Rak tơniăn ăm troăng on tơhrik a kong pơlê kikân, tơnêi tơníu ôh tá tơniăn, kế tơmeăm ‘no liăn roê ôh tá tơdâng tơ’mô ƀă hên tơdroăng ki hên, kŏng ti hiăng mơjiâng túa pơkâ ƀă pêi pro tơniăn tiô pơkâ 3K, mê cho “Hbrâ mơdât – Túa pơkâ - Séa ngăn”.

Kŏng nhân ‘mâi rơnêu on tơhrik kao thế Krông Ƀuk – Ea Hleo

Tung mê, rêm hnoăng cheăng châ xoăng ƀă pơcháu nhên. Hnoăng cheăng rak ngăn kih thuâ̆t 3K châ pêi pro môi tuăn sap ing Kŏng ti troh mâu On tơhrik, Đô̆i rak ngăn mơ’no on tơhrik kao thế. Hnoăng cheăng kố xuân châ mơnhên tối rêm khế, rêm hneăng vâ khĕn kơdeăn mâu tíu pêi cheăng ki pêi pro tro rơkê ƀă teăm tơdrêng tung tơdroăng ki ‘mâi rơnêu.

Mơgrúa trạm biếp áp 110KV Hòa Thuận

Ƀă mâu troăng hơlâ tơdâng tơ’mô, hơnăm 2021, hnoăng cheăng rak ngăn kih thuâ̆t dêi PC Dak Lak châ ối râ ki hngêi tung mâu tíu pêi cheăng on tơhrik lâp tơnêi têa. On tơhrik mơ’no tơniăn, loi tơngah, ôh tá ai tơdroăng xía vâ ‘na biến áp.

Katarina Nga tơplôu ƀă tơbleăng